Kalaallit Danmarkimi najugaqartut kalaallisuunik radiukkut tusarnaagassianik kalaallinit Danmarkimi najugaqartunit tusagassiarineqartunik tusarnaarsinnaasariaqarput.
Taamaattumik kalaallinut Danmarkimi najugalinnut kalaallisut radiukkut aallakaatitassianik tusarnaagassiortoqartalernissaa Aki-Matilda Høegh-Damip, Siumut, aqqutissiuuppaa.
Aki-Matilda Høegh-Dam aningaasaqarnermut ministerimik Nicolai Wammenimik danskit aningaasanut inatsisaannut 2022-mut atuuttussamut isumaqatigiissuteqarpoq Danmarkimi kalaallisut radiukkut aallakaatitsisoqartalernissaanut 7 million kronit illikartinneqassasut. Isumaqatigiissutaasoq piviusunngortinniarlugu Siumup kultureqarnermut ministeri Ane Halsboe-Jørgensenillu isumaqatiginninniutigalugu naammassineqaqqammerpaat.
– Nuannaarutigalugu nalunaarutigissavara, kultureqarnermut ministeri peqatigalugu 7 millioner kronit pilersaarutip piviusunngortinneqarnissaanut isumaqatiginninniutigalugu naammasseqqammeratsigu. Kalaallisut oqaaseqartumik radiuliornissamik soqutigisaqartut septembarip 21-anit qinnuteqarsinnaalissapput, Aki-Matilda Høegh-Dam oqarpoq.
– Kulturitta oqaatsittalu attatiinnarnissaat pingaartipparput. Radiukkut kalaallisut aallakaatitassianik nipilersukkanilluunniit tusarnaarnikkut oqaatsitta attatiinnarneqarnissaat kiisalu kulturitta eriagisatta pigiinnarnissaat suliniutigeqataaffigissavarput. Kalaallit 17.000-it missaanniittut maani najugaqartuupput, taamaasilluni ataatsimuualaarfinni kalaallisut radiukkut tusarnaarnissamut periarfissinnarsinnaalerput, Aki-Matilda Høegh-Dam oqarpoq.
Kalaallit Danmarkimut attuumassuteqartut soorlu tusagassiorfiit, peqatigiiffiit innuttaasullu radiuliornissamut aningaasaliissutinut qinnuteqarsinnaapput. Septembarip 21-anit oktobarip 15-iat ilanngullugu qinnuteqartoqarsinnaavoq.