Maanna piffissanngorpoq tamat oqartussaaqataanerata uterteqqinnissaa. Innuttaasut tassaapput sinaakkusiinissamut aallaavigineqartussat, inooriaatsimillu ilusilersueqataanermi tulluussarfigineqartussat, kissaataannillu naaperiaaffigineqartussat. Nunatsinni ineriartortitseqataanissamut aporfilersuiinnartoqarsinnaanngilaq, taamaattumillu namminerisamik kommuuninngoqqinnissarput pisariaqarpoq
All: Lars Poulsen, Inatsisartunut ilaasortaq, Siumut
Tasiilaq nunaqarfiilu nammineq kommunenngoqqinnissarput merserinagulu sapinngilarput, pisortaniillu aamma taanna tusaaniarneqalernissaa piffissanngorpoq.
Najukkami qinikkat sunniuteqarnerusariaqarput, qulaaniillu aqutsineq naalakkiisarnerlu unilluinnartariqarput, innuttaasullu tusaaniarneqarnerusariaqalerlutik kingumut.
Innuttaasut oqariartuutaat kommunemi qinikkanit salliutinneqarlutik nalilersuutinut peqataatinneqarluinnartariaqarput. Sinaakkutit naapertuutinngitsut immikkullu tulluussagaanngitsut aaliangersarneqartarnerat mumisinneqartariaqalerpoq. Innuttaasut tassaapput sinaakkusiinissamut aallaavigineqartussat, inooriaatsimillu ilusilersueqataanermi tulluussarfigineqarluinnartussat, kissaataannillu naaperiaaffigineqartussat.
Innuttaasut kiffaanngissusaat nungutinneqarsimavoq. Kiffaanngissuseq uterteqqittariaqarparput.
Qanimut oqartussaaqataaneq nungulluinnarsimavoq, innuttaaqataasutut oqqartussaaqataasutut inissisimarusuppugut.
Kitaani Nuummi pissutsit Tasiilamut sanillersuunneqarsinnaanngillat, tassanilu assigiinngissuserput avinngarusimareernerpullu qitiusumiit suusupagineqarput, takuneqarusunnani nassuerutigineqarusunnanilu.
Innuttaasunut kiffartuussivik allaffissornertaqaqisoq systemimiit aqunneqarpoq kinaassuseerukkaluttuinnarlunilu, kiffartuussineq innuttaasut qanimut suleqatigalugit ingerlateqqinneqartariaqalerpoq.
Meeqqanut, Inuusuttunut ilaqutariinnullu sullissineq kitaanut periuserineqartut assigalugit maanna ingerlatsineq piffimmut tulluutinngippallaarujussuarpoq akuersaarneqarsinnaanngilarlu tamanna, aaqqissuussisariaqarpugut tunumi inooriaatsitsinnut kulturitsinnullu naleqquttumik, isiginnaaginnartussiaanngilagullu ingerlatsinikkut sumiginnaasoqartillugu.
Pingaarluinnartut ilagaat Tasiilami nutaaliorusuttunut suliffissanillu nutaanik pilersitserusuttunut periarfissiinerusariaqarnerput, nunatsinnimi ineriartortitseqataanissamut aporfilersuiinnartoqarsinnaanngilaq.