Siumup gruppiata qinersinerup inernera ataqqivaat, taamaattumillu kommunalbestyrelsimi amerlanerussuteqartut qinnuigai, allamik piukkunnartumik borgmesterissamik toqqaaqqullugit
All.: Inga Dóra G. Markussen, Sermersuummi Siumup gruppia sinnerlugu
Ullumi ataasinngornermi novembarip 22-ani 2021 Sermersuummi Aningaasaqarnermut Inuussutissarsiornermullu Ataatsimiititaq ataatsimiippoq, ilaatigut oqaluuseralugit “Iserit A/S-mut taarsigassarsisitsineq ”, tassani pineqarluni 20 mio. kroninik taarsigassarsisitsinissamik aalajangiussaqartoqarsimanera, borgmesterip oktobarip 20-ani 2020 atsiorsimasaa, aamma oqaluuserisassaq “Pissusissaanngitsumik iliornerup killiffia”.
Ataatsimiinnermi 20 mio. kroninik taarsigassarsisitsinissamik aalajangiussisoqarsimanera Siumup akuersaanngilaa, pineqartoq saqqummiussissuteqartoqarnerani tamakkiisumik nassuiarneqarsinnaasimanngimmat.
Oqaluuserisami “Pissusissaanngitsumik iliornerup killiffia”-ni Siumup piumasaraa, borgmesteri tunuassasoq. Tunngavilersuutigineqartut ilanngussami atuarsinnaavatit, tassani nassuiarneqarluni qanoq borgmesterip pisussaaffimminik suusupaginnissimanera, kommunit aqunneqarneranut Inatsisartut inatsisaat naapertorlugu pisussaaffigigaluakkaminik.