Meeqqat misileraataasimasut pillugit danskit naalagaaffiannik eqqartuussivimmut suliakkiineq Siumumit taperserneqarpoq

1951-mi kalaallit meeqqat 22-t ilaquttaminnit pinngitsaalillugit qimagutsinneqarnerat pillugu Siumut Folketingimi aamma Siumut Naalakkersuinikkut aqutsisuugallarmat danskit naalagaaffiata akisussaaffilerneqarnissaa sukataarutigai. Meeqqammi angajoqqaaminnit qimagutsinneqarput, nunamut allanartumut Danmarkimut danskisut ilinniariartorlutik aallartinneqarlutik.

– Siumumi kalaallit arfinillit sinneruttut tapersersorpagut, ilaqutariittut inuunermik, oqaatsiminnik kulturiminnillu ujajaaffigineqarput. Nunatsinnut attuumassuteqarnertik annaavaat. Eqqartuussiviit suliakkernerannut atatillugu sapiissusermik nukissamillu tunineqarluarnissaat neriuutigaarput, Aki-Matilda Høegh-Dam oqarpoq.

Statsministeri Mette Frederiksen utoqqatseriartorluni Kalaallit Nunaannukarusuppoq. Danskit naalakkersuisuisa Kalaallit Nunaannut Naalakkersuisunut suliamut tunngatillugu attaveqartut, Mette Frederiksen Folketingimi novembarip qulingiluaanni apeqqarissaarneqararami Aki-Matilda Høegh-Damimut, Siumut, oqarpoq. Tassani qaqugu utoqqatserneq pisinnaanersoq pillugu naalakkersuisut attaveqarfigineqartut ilisimatitsissutigaa.

Meeqqat misileraataasimasut tamarmik danskit naalagaaffiannit 250.000 koruuninik taarsiiffigineqarnissamik piumasaqarput.

Meeqqat 22-t misileraataasumit nunatsinnit Danmarkimut 1951-imi aallartinneqarput.

Taakku ineriartortitsiniarnermut misileraanermi qitiusimapput, meeqqat danskiunerulernissaat nunatsinnullu uterunik maligassiusunngornissaat anguniagaasimavoq. Meeqqanit taakkunannga 22-nit arfinillit suli uumapput. Taakkulu 80-it missaannik ukioqarlutik.