Arctic Umiaq Line Qeqertarsuup Tunuani angalaleqqittariaqarpoq

All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq

Arctic Umiaq Linep Qeqertarsuarmut aasaanerani angalasarnini unitsillugu aalajangernera akuerisinnaanngilarput. Ilaasut amerlavallaarujussuarnerisa kingunerisaanik umiarsuaatileqatigiiffiup inuttai siniffinnik inigisanullu torersaanermi malinnaasinnaajunnaartartut tunngavilersuutigineqartoq paasisinnaanngilarput, aaliangernerlu kukkunerujussuartut isumaqarfigalutigu.

Qeqertarsuup Tunuani angallannikkut pissutsit imaanaanngereeqisut qaavatigut Arctic Umiaq Line Qeqertarsuup Tunuanut angalassaarpoq.

Illoqarfiit Qasigiannguit, Kangaatsiaq Qeqertarsuarlu Arctic Umiaq Linemit tikinneqarneq ajortut ilagivaat. Illoqarfinni pineqartuni innuttaasut toqqissisimallutik angalasinnaanissartik nunatsinni akileraaqataasartutut allatuulli toqqissisimallutik angalasinnaanissamut pisinnaatitaaffeqarput.

Piffissami sivitsortumi illoqarfiit Qasigiannguit, Kangaatsiaq piffissamilu matumani Qeqertarsuaq Arctic Umiaq Linemit tikinneqarneq ajorput. Tamanna illoqarfinni taaneqartuni innuttaasut toqqissisimallutik angalasinnaanissaannut pisinnaatitaaffiinik arsaartuinertut taasarialimmik Arctic Umiaq Line angalaneq ajorpoq.

Arctic Umiaq Line Qeqertarsuup Tunuani Qasigiannguanut, Kangaatsiamut Qeqertarsuarmullu angalaleqqittariaqarnera ataatsimoorullugu piumasaraarput.

Innuttaasut 600-t atsiortut

Naluneqanngitsutut Arctic Umiaq Line Qasigiannguanut aqqusaarneq ajorpoq, tamannalu pillugu Qasigiannguani innuttaasut namminneq iliuuseqarlutik atsiornernik 600-nik katersisimallutik.

Qasigiannguani innuttaasut pingasuullutik nammineq kajumissusertik atorlugu oqaloqatiginnikkiartorlutik Nuummukarnikuupput. Arctic Umiaq Line pisortaanera tullersortaalu aammalu Naalakkersuisut Siulittaasuat naapinneqarnikuupput, taamaalillutik atsiornerit katillugit 600-t tungaanut amerlassuseqartut Arctic Umiaq Linemut Naalakkersuisunullu tunniunneqarnikuullutik.

Qeqertarsuup Tunuani imaatigut angallassineq qanoq kipiluttunartiginersoq sukumiilluinnartumik nassuiaassissutigineqareerpoq.  

Qasigiannguani efterskoleqalernikuunerput eqqarsaatigalugu inuusuttorpassuit illoqarfitsinnut atuariartukaasartut angalaniarnikkut kipiluttunartumik pisarioqisumillu atugassaqartinneqarput. Taamatullu mikisunik meerartallit, nakorsiarlutik angalasut, utoqqaat, inuit innarluutillit umiatsiaaqqat atorlugit ilaatigut namminneq angalanissamut aqqutissarsiortariaqarnerat naliginnaasuuvoq. Navialisoqannginnerani aaqqiisoqartariaqarpoq. Innuttaasut toqqissisimallutik angalasinnaasariaqarput.

Arctic Umiaq Linemit minnerunngitsumillu Naalakkersuisuniit Qeqertarsuup Tunuani imaatigut angallassineq eqqarsaatigalugu qanoq imaannaanngitsiginera toqqissisimananngitsigineralu paasineqartariaqalerpoq.

Qeqertarsuup Tunuani angallannikkut pissutsit imaannaannginnerat pissutigalugu innuttaasut Naalakkersuisunit tikeraarneqarnissaminnik piumasaqarnerat paasilluarsinnaavarput. Taamaammat Qeqertarsuup Tunuani innuttaasut eqqarsaatigalugit Naalakkersuisut Qasigiannguanut, Kangaatsiamut Qeqertarsuarmullu tikeraarnissaannik inussiarnersumik piumasarerusupparput. Pisumi matumani Kommune Qeqertalimmi Borgmesteri sassartariaqarpoq, innuttaasullu Kommune Qeqertalimmi toqqissisimallutik angalasinnaalernissaat anguniarlugu Naalakkersuisunut tinnersaaqataasariaqarlerluni.

Angallannikkut pissutsit pitsanngorsarniarlugit angalasut atuisullu qanimut peqataatillugit oqaloqatigiinnerit aallartinniartigit.