Aatsitassarsiorneq – Ikummatissarsiorneq

Siumup anguniarpaa nunatta pisuussutai innuttaasut suleqatigalugit iluaqutaanerpaamik atorluarneqassasut. Aatsitassarsiorneq Nunatta piumasaqaatai tunngavigalugit ingerlanneqassaaq – inuiaqatigiinnullu aningaasarsiornikkut iluaqutaassaaq.

Siumup sulissutigaa nunatta pisuussutaasa iluaqutigineqarnerat inuiaqatigiit aningaasaqarnerannut toqqissisimanartumik iluaqutaalissasoq. Pisuussutinik atuineq nunatsinnit aqutsisuuffigineqassaaq, inunnut avatangiisinullu ajoqusiinngitsumik ingerlatsinikkut.

Aatsitassarsiorneq ikummatissarsiornerlu nukissiuutinik minguitsunik aallaaveqartinneqassaaq – soorlu seqineq, anori, imeq imaluunniit e-fuels atorlugit. Uuliamik piiaaneq avatangiisinut navianartorsiortitsisinnaammat, upalungaarsimanissaq qulakkeerneqarsimassaaq.

Siumup akuerinngilaa mingutsitsineq, taamaattumillu nakkutilliineq nukittorsarneqassaaq, unioqqutitsisunut sakkortuumik pineqaatissiisarneq periarfissatut piareersimaffigineqassalluni.

Aatsitassanik ingerlatsinerni suliffeqarfiit inuiaqatigiit paasissutissinnissaat pisussaaffigaat, tamannalu kalaallisut pisassaaq. Aatsitassarsiornermi suliffeqarfiit nunatsinneersut peqataatinneqassapput, aamma piginneqatigiilluni ingerlatseqataanissamut nunarput periarfissaqartinneqassaaq.

Sulisut amerlanerpaat nunatsinneersut pilersinneqassapput. Pikkorissarnerit ilinniaqqinnerillu susassaqartut peqatigalugit ineriartortinneqartuassapput.

Uran sinneruttunut akuuppat piiarneqarsinnaassaaq, nunarsuarmi isumannaallisaanermut malittarisassat malillugit.

Nunatsinni aatsitassarsiorneq peqqissutsimut pinngortitamullu akornusiinngippata aallartinneqarlutik aningaasarsiutaalertariaqartut Siumut isumaqartuarpoq. Aatsitassarsiorfiusinnaasut inoqarfinnut qanittumiittut tamarmik immikkut ittumik avatangiisinut peqqissutsimullu tunngasunik annertusisamik piumasaqaateqarfigineqarnissaat Siumup avaqqunneqarsinnaanngilluinnartutut isumaqarfigaa aamma sumiiffimmi najugaqartut paaseqatigalugit tamanna ingerlanneqassaaq.

Aatsitassarsiorfiit uuliasiorfiillu ingerlanneqartussaatillugit tamatigut kommunit qanimut peqataatinneqartassapput, tamatumani isumaqatiginninniarnerni IBA-mik taaneqartartuni aatsitassarsiorfiusup qanigisaani inoqarfiit sapinngisamik annertunerpaamik peqataatinneqarlutillu iluanaaqataatinneqarnissaat qulakkeerneqartassaaq.  IBA-mik isumaqatigiissummi isumaqatigiissutigineqartut ataqqineqanngippata tamanna tunisassiorsinnaanerup ingerlaannartumik unitsinneqarnissaanik kinguneqartassaaq.

Ujaqqat, sioqqat il.il.

Nunatsinni ujaqqat sioqqallu assigiinngitsut atorneqarsinnaasut nalunaarsorneqassapput ilisimatuussutsikkullu misissorneqarlutik. Inuiaqatigiinnut paasiuminartumik ilisimasat siammarterneqassapput innuttaasut periarfissanik atuisinnaaqqullugit.

Ujaqqanik erlinnartunik allanillu ujaqqanik pinnersaasiassanik unioqqutitsisumik annissuisoqarnersoq nakkutigineqaqqullugu, annertusisamik nakkutilliisoqarnissaa Siumup sulissutigissavaa. Nakkutilliisoqarfiup pilersinnissaa Siumup sulissutigissavaa, soorlu piniarnermik nakkutilliinerit aamma aaqqissuunneqarsimasut. 

Ujaqqanik piiaanissamut akuersissutinik nutarterisoqassaaq, suliffeqarfiit inuillu atuilersinnaanissaat pisariillisarniarlugu. Basalti, qarmasissiaq, sioqqat il.il. nunatsinni teknikikkut atorneqarsinnaasut pillugit ilisimasaqarneq siuarsarneqassaaq.

Sioqqanik ujaqqanillu niuerneq – nunatsinni aamma avammut – inuiaqatigiit iluaqutissaatut aaqqissuunneqassaaq.