Ukiuni arlalinni aalisarnermut inatsit nutarterniarneqartartoq oqallisaajuarpoq aamma piffissami matumani saqqummiunneqarnissaa sammineqallattaartarpoq. Inuiaqatigiit aningaasarsiorneranni nappaterput pingaarnerpaaq nutartertariaqavissoq pineqaleraangat, aalajangernissaq kinguarsarneqartutut ilisarpoq, tassami soqutigisaqaqatigiit assigiinngitsut sunniiniarnerillu amerlaqisut peqqutaaqataalertarput. Aaliangertariaqalerpugulli!
Siumut isumaqarpoq, aalisarnermut inatsit nutarterneqarluni aallartinneqartariaqartoq, tamattalu suleqatigiilluta alloriaqqinnissarput aalajangiisinnaassuseqarnerpullu takutissagipput.
Siumut isumaqarpoq immami pisuussutitta nunatsinnut aningaasarsiutigineqarnerulernissaat aqqutissiuutissallugu suliassatsinnut avaqqunneqarsinnaannani ilaalluinnartoq. Tamanna Aalisarneq pillugu Ataatsimiititaliarsuup annerusumik tikinngilaa. Aalisarneq iluaqutsiullugu aningaasarsiornitta uatsinnut kalaallinut iluaqutaanerujartuinnartumik ingerlalernissaa aqqutissiuutissallugu pingaaruteqarpoq piffissanngorlunilu inatsisip aaqqiiviginissaa, nunarput inuilu pillugit.
Aalisarneq pillugu ataatsimiititaliarsuup innersuussutai tamarluinnaasa Siumup Inatsisartuni gruppiata nalilersoqqissaarsimavai; pitsaaqutit, ajoqutaasinnaasut nalilersoqqittariaqartullu eqqartorsimallugit. Siumup inatsisartuutitaasa isummersimanerat Siumup Siulersuisuunerisa nunallu immikkoortuini Ataatsimut Siulersuisut ilanngullutik eqqartorsimalerpaat.
Suleriuseq taanna atorneqarpoq pissutigalugu, inatsit inuunitsinnut aningaasarsiornitsinnullu pingaaruteqarluinnartoq pineqartillugu, tunuliaqutaasut akuutinnerisigut angusassaq angujuminarnerussammat, minnerunngitsumik nalorninaatsumik aalisarneq pillugu politikiminik Siumup saqqummiussaqarnissaa pingaaruteqartutut Siulersuisuunernit isigineqarmat. Taamaattumik aalisarneq pillugu inatsisiliornissamut Siumut toqqammaveqarluarluni oqaloqataanissamut piareerpoq.
Aalisarnermut pisinnaatitaaffiit pisussaaffiillu pillugit isummernerit ersarissut tassaapput, Siumup ataatsimeersuarnerani anguniagassatut isumaqatigiissutigineqarsimasut aamma Aalisarneq pillugu Ataatsimiititaliarsuup isumaliutissiissutaanni taakkartorneqartut ataasiakkaat Siumup iluani isummerfigineqarlutik toqqammavissinneqarsimanerat.
Siumup aalisarnermut inatsimmi piumasaqaatissai aamma aaqqiissutissarpassuit tunngavissitassat pillugit Siumup siulittaasua suleriaqqinnissamut isumalluarpoq.
– Inuiaqatigiit pisuussutaat inunnut amerlanerusunut iluaqutaalersinneqassapput, siammaanikkut aamma ersarissunik piumasaqaasersuinikkut. Soorlu nunatsinni naleqalersitsinerunerit aamma nunatta immikkoortuini tamani tulaassisussaatitaanermut tunngasunik malitseqartussanik, Erik Jensen oqarpoq.
– Taamatuttaaq pisassiissutinik aqutsiveqarfiliortoqarnissaa (licensstyrelsi) Siumumit akuerineqarsinnaanngilaq. Inuiaqatigiimmi pisuussutaat pingaarnerpaat atorfilittaniit allaniilluunniit avataaneersunit agguaanneqartalertussanngortinneqassanngillat, aamma qinikkat tunngavissiillutik aalajangiisinnaajunnaarsinniarneqassanngillat. Pisassiisarnermili maleruagassat ersarissut pilersinneqassapput, ammasumik kammalaatersorfiunngitsumillu ingerlatsinerup qulakkeersimanissaa tamatsinnut pingaaruteqarmat, Siumup Siulittaasua Erik Jensen oqarpoq.
Sinerissap qanittuani aalisarnermi 5 tons ataallugu pisaqartarsimasut akuersissutaannik atorunnaarsitsinissamik eqqartuinerit Siumup isumaqatiginngilluinnarpai. Aalisartut umiatsiaararsortut aamma nunaqarfinni innuttaasut aningaasarsiorsinnaanerat innarlerniarneqarsinnaanngilluinnartoq Siumut isumaqartuaannarpoq. Aalisagaq immini ajornartorsiutaanngilaq, Siumullu isumaqarpoq killilersuisoq tassaanerpaajusoq pinngortitaq aamma tunitsivitsigut killilersuinerit, selskabersuarniit anginerniit aqunneqarnerusut.
– Sinerissap qanittuani qaleralinniarnermi umiatsiaararsortunut IOK (Individuelle Omsætlige Kvoter) atuutsinniarneqassappat, pitsaaqutit mianerisassallu nalilersoqqaarneqassasut Siumup kissaatigaa. Tassami siusinnerusukkut taamaasiornermi rejerniarnerup iluani misilittakkat iliuuserisimasallu kingunerisimasaat eqqumaffigeqqissaarlugit sulineq ingerlanneqartariaqartoq Siumut isumaqarpoq, Erik Jensen oqarpoq.
Piffissami aggersumi Siumup aalisarnermut inatsisissamut sinaakkusiussai saqqummiussuuneqarlutik ingerlanneqassapput.