Naalakkersuisunut allakkat ammasut
Piffissami kingullermi Naalakkersuisunit tikeraarneqallattaarnerput nuanneq, piffissamilu matumani pissanganartutut isigaara Naalakkersuisut assigiinngitsut tikeraartitta oqaloqatiginerani eqqartukkatta qanoq iliuuseqarfigiumaneqarnissaat qanoq pimoorutsigineqarnersut paasissallugu.
All.: Simon Simonsen, Kommune Kujallermi Kommunalbestyrelsimut ilaasortaq, Siumut
Naalakkersuisummi oqaloqatigisat tamarmik ersarissumik oqariartuutigaat Kujataata inuussutissarsiornikkut siumut aallartinneqarnissaata pisariaqavinnera, tamassumallu qanoq iliuuseqarfigineqartariaqarnera allaqqunneqarsinnaanngitsoq.
Taamaattumik maanna uanga Kommune Kujallermi Kommunalbestyrelsimi ilaasortatut assut paaserusullugit Naalakkersuisunut apeqqutinik pingasunik una allagaq ammasoq aqqutigalugu apeqquteqaateqarusuppunga.
Nanortalimmi suliffissuaq
Siullermik, Nanortalimmi aalisakkanik suliffissuaq piginneqatigiiffimmit APF-imit pigineqartoq sooq pisassamigut 2000 tonsinik ilanngaaffigineqarsimanersoq paaserusuppara.
Ilisimavara suliffissuaq qanoq Nanortalimmut Kommune Kujallermullumi pingaaruteqartigisoq, tassami maannamut inuit 50-it tungaanut aalaakkaasumik ukioq kaajallallugu sulipput, sulilluarlutillu avammut tunisassiorluartut Nunatta karsianut akitsuutitigut isertitaqaataalluartumik minnerunngitsumillu Kommune Kujallermi akileraarutitigut isertitaqarfiulluartumik.
Paasivarami APF-ip aalisakkat pisassai 2000 tonsinik ilanngarneqarnerisa kingunerisaanik suliffissuaq ukialerpat september 2023 tikiinnaraa tunisassiassaarunnerup kingunerisaanik unittariaqalissasoq, sulisullu pineqartut 50-it missaat tassa suliunnaarlutik angerlartinneqaannartariaqalissasut – Kommune Kujallermut aningaasaatikereeqqisumut annertuumik aningaasatigut kinguneqarnerluttumik, tassami akileraarutitigut sulisut akileraarnerisigut isertussaagaluit annaaneqassapput kiisalu isumaginninnermut aningaasartorfiulersussanngussallutik, ikiorsiissutinimmi pisariaqalersussaassammata.
Taamaattumik uku allakkat atorlugit Naalakkersuisut apererusuppakka ilumut Nanortallip uummataa aalisakkanik suliffissuaq pisassanik ikililerinermikkut taamak inissinniarneraat. Tassalu ukiap aallartilaarnerani matusariaqalersillugu Inuillu sulilluartut suliunnaarsillugit.
Nammineq pilersornerulernissaq
Taakku saniatigut nammineq Nunatta tunniussinnaasaanik pilersornerulernissaq aalajangiusimaneqartoq eqqaaneqartuarlunilu eqqartorneqartuartoq ilumut aamma Naalakkersuisunit pimoorunneqarnersoq assut paaserusunnarsivoq, tassami ungasinngitsumi paasitinneqarpunga Nunatta Kujataani naatitsisartuniit naatinneqarsimasut naatsiiat (katorfilit) tonserpassuit nioqqutigineqaratik eqqaanarneqartut, tusagaq tupaallannaq! Aalassannarlu, ilami anguniakkat kusanarluinnartut nammineq pilersornerulernissamik imallit paasinarpoq oqaasiinnaasut?
Aalassannarpoq assut! Ilisimallugu savaatillit naatitsisartut piffissaq annertooq sulinerujussuarlu atorlugit pilersissimasaat suusupagalugillusooq nioqqutiginagit tassa eqqaanarneqartussanngortut.
Taamaattumik Naalakkersuisunut apeqqutigerusunnarpoq ilumut nammineq pilersornerulernissaq pimoorunneqarnersoq. Taamaasimappat pisimasut qulaani eqqartukkakka qanoq iliorlutik siunissami pinaveersaartinniassamaarneraat paaserunnarpoq.
Nunatsinni tunisassianik avammut niuerneq
Apeqqutissama pingajuat tassaavoq nunatsinni aallarnisaallutik avammut niuerniartut qanoq pimoorussaatigisumik Naalakkersuisuniit tapersersorniarneqarpat?
Tassami ilisimavara maani Kujataani aallarnisaasut ilaata puisip orsuanik nunani allani iisartagaliassanik avammut niuerniarluni siornali aallartisartoq, pineqartoq Kommune Kujallermi tapersersorparput ilaatigut sumiiffissaanik inuussutissalerinissamut akuerisamik periarfissiinitsigut.
Pineqartoq Kinamiunik puisip orsuanik tigooraasussanik suleqatissarsereersimavoq tigooraalernissaminnut utaqqiinnartunik, ajoraluartumilli EU-p malittarisassaaninngooq sukannersunik Qallunaat Nunaaniit aporfilersorneqartumik uninngatinneqarpoq, tassami aallarnisaasoq pineqartoq siornali puisip orsuanik piniartuniit pisiortorluni aallartereernikuugaluarpoq 10 tonsillu tungaanut uningasuutigalugit qeritsitsivimmi, taakkulu maanna uningavallaalernerat pillugu igiinnartariaqalernissaat qanittumi pisariaqalersinnaasoq oqaatigineqarpoq.
Taamaattumik inuussutissarsiutinik namminersorlutik aallartisaallutik maanna inerisaaniartut qanoq Naalakkersuisuniit tapersersorniarneqartiginersut paasissallugu pingaaruteqarpoq.
Suliniummi una aallarnisaasumiit ingerlanneqartoq assut Nunatta Kujataani inuussutissarsiornikkut ineriartortitsinermut aamma ilaalluartussaq, minnerunngitsumillu piniartut puisimik atorluaanerulernissaanik kinguneqartussaq, iluatinnaqimmat.
Akissutisinissara qilanaaralugu allakkakka ammasut matumuuna nassiuppakka.