Aningaasaqarneq akileraarutillu
Nunatta nammineq aningaasarsiorluni napatissinnaalernissaa anguniarparput. Pisuussutivut atorneqassapput, suliffissat pilersinneqassapput atugarissaarnerlu annertusarneqassaaq.
Siumup anguniarpaa nunatta aningaasaqarnikkut imminut napatissinnaalernissaa kiffaanngissuseqartumillu aningaasaqalernissaa. Tamanna ilaatigut anguneqassaaq tunisassiornerup ineriartortinneqartuarneratigut, aamma nukissiuuteqarnikkut mingutsitsinngitsumik ineriartortitsinikkut avammullu niueruteqarnikkut. Inuiaqatigiit isumannaatsumik inuuniarnikkut atugaqarnissaat qulakkeerneqassaaq, atugarissaarnerlu annertusarneqartuassaaq.
Pisuussutit inuiaqatigiit pigaat. Uumassusillit uumassuseqanngitsullu iluaqutigineqarnissaat inuiaqatigiit aningaasaqarnerannut iluaqutaassaaq.
Inuussutissarsiutit aalisarneq, nunaateqarneq, aatsitassarsiorneq, takornariaqarneq aamma pisuussutivut immikkuullarissut, soorlu imeq pinnersaasiassallu, ilaallutik inuussutissarsiutit arlariinngorlugit ineriartortinneqarnerinut ilaasapput. Inuussutissarsiornikkut ingerlatsineq nunat tamalaat akornanni unammillersinnaassuseqassaaq.
Kommunit suleqatigalugit nunap immikkoortuini ineriartorneq ataatsimut ingerlanneqassaaq. Najugaqarfinni ineriartortitsineq innuttaasut suleqatiginerisigut aalajangersaaqataanerisigullu ingerlanneqassaaq. Pisortat suliffeqarfiutaat sapinngisamik siammasissumik ingerlanneqassapput, aningaaserivitsigullu kiffartuussineq tamani periarfissaassaaq.
Siumup eqqunniarpaa sapaatip akunneranut akunnerit 37-t suliffiusarnissaat, aningaasarsiornikkut ajortumik sunniuteqassanngippat aamma ilaqutariinni ataqatigiinnermut nukittorsaanissamut iluaqutaassappat. Utoqqalinissamut ileqqaarnissamut pisussaaffeqarneq pisinnaasunit atorneqassaaq, aaqqissuussinerlu pissutsinut piviusunut naleqqussartuarneqassaaq.
Akileraartarnermut politiki
Akileraartarnermut aaqqissuusseqqinneq pisariaqartinneqarpoq, aaqqissuusseqqinnernilu akunnattumik isertitallit isertitakinnerusullu nalimmassaaffigineqarnissaat salliutinneqassapput. Eqaannerpaamik akikinnerpaamillu akileraarusersuinikkut ingerlatsisoqassaaq aamma inummut ilanngaat ataavartumik naleqqussarneqartassaaq.
Sullivinnik pilersitsiniaqatigiiffiit akileraarutaat aamma suliffeqarfiit akileraarutaat naleqqussarneqassapput, nunanut sanilerisatsinnut unammillersinnaassuseq anguneqaqqullugu.
Akitsuutit suulluunniit aningaasarsiornermut pitsaanerpaamik iluaqutaaqqullugit inissinneqassapput. Inuiaqatigiit pisariaqartitaat aallaavigalugit nioqqutissanut akitsuusersuinerit ingerlanneqassapput.