Killiffik eqqarsaatigalugu takusinnaanngilarput ilumut qulimiguullit nutaat kiffartuussinissamut naleqquttuunersut. Anillariarfiusinnaasumik nassaarniartoqartariaqartoq ilungersortumik piumasaraarput
All.: Sakio Fleischer, Avannaata Kommuniani Siumut Gruppiani siulittaasoq
Aasaq qulimiguullit nutaanik taaneqartut Uummannap eqqaani angallassillutik aallartimmata isumalluarsimaqaagut, tassami oqaatigineqarmat Bell 212-init piginnaasaqarnerullutillu sukkanerullutillu ikummatissamik atuinikinnerusut, aammalu ilaasoqarnerusinnaasut oqaatigineqarmat kiisami annertuumik pitsanngoriartoqarnissaa isummatsinniissimavoq.
Piffissalli ingerlanera ulloq manna tikillugu, takusinnaalerparput ajoraluartumik qulimiguullit taakku ilumut naleqqunnersut apeqqusiisariaqaleratta, tassami piffissap ingerlanerani taamaatitsiinnartariaqartarnerit aatsaat taamak amerlatigisut toraarpagut.Tamanna angalaniartunut annertuumik kipiluttunartumik eqquisaqattaarpoq, piffissarlu kimulluunniit uninngatitaasumut akeqarmat qularnanngitsumik innuttaasunut annertuumik eqquisimassasoq naatsorsuutigisinnaavarput.
Assersuutigalugu Kommunalbestyrelsimi ilaasortaaqaterput piffissami qanittumi ullunik aqqanilinnik kinguaattoorpoq, allatut ajornartumik naggataatigut angallammik aatiinnartariaqalerluni. Tamatumunnga ilapittuutaavoq Uummannap nunaqarfiinut sapaatip akunneranut ataasiaannarluni timmisartuaqqap angalasalernera, tamanna innuttaasunut angalasussanut annertuumik eqquivoq, tassami siusinnerusukkut nunaqarfiit marloriarlutik orninneqartarnikuusut eqqarsaatigalugit.
Taamatullu Upernavik nunaqarfiinilu, Qaanaaq nunaqarfiinilu aammalu Diskobugtimi nunaqarfiinut qulimiguulimmik angalaniarneq kipiluttunartumik killeqqavoq.
Maanna killiffik eqqarsaatigalugu takusinnaanngilarput ilumut qulimiguullit taakku kiffartuussinissamut naleqquttuunersut, taamaammat nalilersueqqittoqarnissaa assut eqqarsaatigeqqunarpoq, taamatut ingerlaaseqarnissaq siunissami atuutsinneqaannassappat eqqarsarnartorujussuarmiissaagut pissutsit atoriikkagut eqqarsaatigalugit.
Taamaattumik ilungersortumik kissaateqarnerput apuupparput killiffik inissisimavipput pitsaanngitsutut nalilerlugu anillariarfiusinnaasumik nassaarniartoqartariaqartoq piumasaqaatigalugu isummersornerput matumuuna apuullutigu.