Utoqqaat pillugit politikitsinni inuup naleqassusia aallaaviuvoq – tamatumalu siunertaasa ilagaat toqqissisimaneq pitsaassuserlu.
Nunatsinni utoqqanngorluni inooqataaneq nuannersuusariaqarpoq. Utoqqaat illoqarnikkut sussassareqatigiinnikkut aningaasaqarniarnikkullu atugarissaartut inuiaqatigiinni suleqataajuarnissamut piumassuseqassapput, taamaattumik utoqqaat ajunngitsunik atugaqarnissaat periarfissaqartitaanissaallu Siumup sulissutigiuarpaa.
Utoqqaat sulisinnaasut sulisinnaajuarnissaat suliffeqarfinnit pisussaaffiujuartariaqarpoq.
Innuttaasut utoqqalisut suliffeqareernermiit utoqqalinersiuteqalernissamut pitsaasunik atugassaqarnissaat qulakkeerneqassaaq, suliffeqarfiillu tamatumani akisussaaqataanerat pissusissamisoorpoq. Pilersueqatigiittussaanerup inatsisaa allanngortinneqassasoq Siumup sulissutigissavaa.
Utoqqaat imminnut ikiorsinnaanngitsut nammineq angerlarsimaffimminni sapinngisamik sivisunerpaamik najugaqarnissaat qulakkeerneqassaaq, angerlarsimaffimmi ikiorteqarnikkut. Utoqqaat ikiorneqarnissamik pisariaqartitsisut angerlarsimaffinni, paaqqinnittarfinni ininilu illersugaasuni pitsaasunik naammattunillu inissaqartinneqassapput. Siumup nangittumik suleqataaffigissavaa utoqqaat piginnaasaqarnerusut angerlarsimaffissaannik pilersitsiortorneq.
Nunatsinni puigortunngortut amerliartorput, taamaattumik puigortunngortunik sullissineq pitsanngorsarneqartuartariaqarpoq. Utoqqaat pillugit periuserineqartussatut tunaartarineqalersoq nalilersortuarneqassasoq Siumup sulissutigissavaa. Taassumalu malitsigisaanik puigortunngornermut pitsaanerpaamik sullissinissaq siunertaralugu sulisunik pikkorissaajuarnissap ingerlattuarneqarnissaa.
Siumut isigaluni utoqqalinersiutissanut aningaasaateqarfinnik aaqqissuussinikkut utoqqaat aningaasaqarnikkut pitsaasunik atugaqarnissaat qulakkeerneqassaaq. 67-inik ukioqalernermiit utoqqalinersiuteqalersinnaaneq periarfissaajuartariaqarpoq. Utoqqaat utoqqalinersiutillit saniatigut isertaqarusuttut periarfissaqartuartariaqarput utoqqalinersiutiminnik ilanngaaffigineqaratik. Utoqqaat tamarmik naligiimmik utoqqalinersiuteqassapput, katissimaneq, aappariinneq najungaqatigiinnerluunniit apeqqutaatinnagu. Ukiorpassuarni suleruloreernermi 64-nik ukioqalernermi utoqqalinersiaqalersinnaanerup periarfissaanissaa Siumup nalilersussavaa.
Siumup pingaartippaa Utoqqaat Nipaata Kattuffiat ersarissumik utoqqarnut politikeqarnertigut qanimut suleqatigineqartuarnissaa. Kommunit aaqqissuuteqqinneqarsimanerat ilutigalugu utoqqaat siunnersorteqartarnissaat isumannaarneqartariaqarpoq. Kattuffiup ingerlalluarnerunissaa tusarsaanerulernissaalu siunertaralugu Kattuffiit allat assigalugit ilaasortat namminneerlutik akiliuteqartalersinnaanerat Siumup aqqutissiuukkusuppaa. Soorunami Utoqqaat qanimut suleqatigalugit.
Siumup sulissutigaa inoqarfinni tamani utoqqaat ataatsimuualaartarnissamut timersoqatigiittarnissamullu periarfissaasa pitsaanerulersinneqarnissaat.
Utoqqartatsinnut soraarnerussutisiat tungaatigut minnerpaaffiliinissaq anguniarneqassaaq. Aalajangersimasunut aningaasartuutit akilereerlugit utoqqaat naammattunik aningaasaateqarnissaat qulakkeerneqassaaq.
Utoqqaat illuinik sanaartornerit immikkut misissuiffigineqassapput.
Puigortunngortut pillugit sullissinissaq sinaakkusiinissarlu, soorlu ineqarnikkut kiffartuunneqarnikkullu atugaannut naleqquttumik aaqqissuussisoqassaaq.