Inuiaqatigiit ineriartoqqinnissaannut siuariartornissaannullu atugarissaarneq tunngaviussaaq. Inuiaqatigiit atugarissaarnikkut nukittuumik inissisimasut ilaqutariit tunngavissaraat ikiorneqarnissamillu pisariaqaritsisut ikiorneqarnissaat qulakkeertariaqarluni. Inuiaqatigiit atugarissaarnerat pitsaasoq tassaavoq peqqinnissamut ilinniarnissamut suliffeqarnissamullu atugarisatigut periarfissaqarneq, sumi inissisimaneq apeqqutaatinnagu.Â
Siumut tunngaviusumik isumaqarpoq nunatsinni innuttaasoq kinaluunniit peqqissoq imminut napatinnissaminut killilerneqanngitsoq. Nunatsinni inuk kinaluunniit atugarisami pitsanngorsartuarnissaanut akisussaaqataavoq. Isumaginninnermut ikiorsiissutit sulinerup akilersinnaanerujuarnissaanik qulakkeerinnittumik annertussusilerneqartariaqarput.
Siumut isumaqarpoq innuttaaqataasoq kinaluunniit pisussaafeqartoq ilaquttaminut, qanigisaminut nunaqqatiminullu inooqataanermini timikkut tarnikkullu inuunerup atoruminartuunissaanut suleqataanikkut akisussaaqataassalluni.
Siumut isumaqarpoq inunnik isumaginninnikkut sullissinerit ikiorsiisarnerillu tamarmik, naatsorsueriaatsit naleqassutsimik aallaaveqartut sakkugalugit, ingerlaavartumik nalilersorneqartariaqartut naleqqussartuarneqarlutillu. Taamaaliornikkut nunatsinni sullinneqartunut tamanut sullissineq pitsaanerpaaq naligiinnerusorlu anguneqassaaq, tamannalu ineriartortinneqassaaq Namminersorlutik Oqartussat kommunillu suleqatigiinnerisigut. Isumaginninikkut sullissineq imminut ikiornissamik aallaaveqartillugu ingerlanneqartassaaq.
Siumut isumaqarpoq inunnik sullissinermi sulisorisat tamarmik ataavartumik pikkorissartinneqartarnissaat periarfissaajuartariaqartoq.
Isumagineqarnissamik pisariaqartitsisut imminut ikiorsinnaanngorlugit ikiorserneqartarnissaat Siumup politikkerisaa aamma kommunerujussuit siunnerfigisariaqarpaat.
Maannakkut ajornartorsiutaavoq isumaginninnerup iluani ilinniarsimasut illoqarfinni anginerniikkumanerunerat. Taanna atorfinitsitsinermi isumaqatigiissutitigut eqaannerusumik aaqqiiffigisariaqarpoq.
Suliagut tamarmik meeqqanik ilaqutariinnillu ingerlallualersitsinissamik siunertaqarput:
- Inunnik sullissisut ilisimasaasa atorluarneqarnerunissaat siunertaassaaq.
- Ilaqutariit siusinaartumik ikiorserneqartarnissaat anguniarneqassaaq.
- Angajoqqaarsianngortitsisarneq nukittorsarneqassaaq, institutioninut tunniussisarneq annikillisarneqarluni. Ilaqutariit iluani angajoqqaarsianngortitsisinnaaneq ataqatigiittumik aaqqissorneqarnissaa anguniarneqassaaq.
- Angajoqqaarsianut tapiissutit naleqquttumik inissinneqarnissaat anguniarneqassaaq.
- Kommunit akornanni assigiimmik inatsisit tunngavigalugit sulisoqassaaq, tamanna anguniarlugu ataqatigiissaarisussamik pisariaqartitsisoqarnera oqariartuutigineqartariaqarpoq.
- Tarnikkut napparsimasut saaffiginninnissamut ikorfartorneqarnissaat pimoorullugu anguniarneqassaaq.
- Tarnimikkut innarluutillit periutsit allat atorlugit ikiorsersorsinnaanissaat sutigut tamatigut anguniarneqartariaqarpoq.
- Atuarfeqarfinni inunnik isumaginninnermi siunnersortinik kommunini tamani pilersitsinissaq angunianeqartariaqarpoq.
- Inunnik isumaginninneq assannik amerlasuunik pisariaqartitsivoq siunissarlu ungasinnerusoq eqqarsaatigalugu utoqqaat amerliartortussaapput, taamaattumik siunissami sulisussat isumannaarnissaat aqqutissiuunneqartariaqarpoq.
- Inunnik isumaginninnerup iluani pisinnaatitaaffiit, soorlu angajoqqaat innarluutilimmik meerallit pisinnaatitaaffii, erseqqarissumik paasinartumillu susassaqarfinni saaffiginnittarfinnilu takuneqarsinnaaneri aqqutissiuunneqassapput Innarluutillit oqaaseqartartortaavat peqatigalugu.