Tallimanngormalli Namminersorlutik Oqartussat ingerlatseqatigiiffiinut piginnittuunermik politiki pillugu eqqunngitsunik tusarliisoqaqattaarpoq. Isumaqatigiissutaavoq ungasinngitsukkut partiit sisamat isumaqatigiissutigisaat. Siumumi isumaqatigiinniartitat ilaattut sakkortuumik akerlilerpara Siumut isumaqatigiissummik atsioqataasimasoq Namminersorlutik Oqartussat ingerlatseqatigiiffiini piginnittut akuliussinnaanngitsut allassimasumi. Tamanna eqqortup akerlerluinnaraa!
All.: Inga DĂłra G. Markussen, aaqqissuusaanermut siulittaasup tullia, Siumut
Isumaqatigiissummi atuarluaraanni maannakkut – kiisami – Namminersorlutik Oqartussat ingerlatseqatigiiffiinut tigussaasunik piumasaqaateqartoqalerpoq. Isumaqatigiissutip ”aqutseriaatsit” pisoqqat piginnittut maannamut malissimasaat taarserpai. Namminersorlutillu Oqartussat ingerlatseqatigiiffiini aqutsisut maanna ilisimalerpaat inuiaqatigiittut, piginnittutut ingerlatseqatigiiffinnut suut naatsorsuutigisinnaanerlugit. Atuartup eqeersimaartup takusinnaassavaa isumaqatigiissut ukiuni tallimani atuuttoq, ukiulli tamaasa ataasiarluni misissorneqartassalluni piffissarlu naappat nalilersorneqarluni.
Isumaqatigiissutip kingunerissavaa Naalakkersuisut maanna piginneqatigiiffinni ataatsimeersuarnermut takkussinnaalernerat, naatsorsuutigisatik piumasaqaatitillu saqqummiullugit, Inatsisartut 90 procentiisa akuerisaat innersuussutigalugit. Tamanna erseqqissassallugu pingaartuuvoq!
Eqqortut eqqunngitsullu
Isumaqatigiissuteqarnermi Siumup nammineq anguniakkami akerlianik akuersisimanermik oqalunneq tunngavissaqanngilaq, maluginiagassaavorlu inuit ilaasa taamaattuutinniarsarigaat. Taamatut oqaluttoqarpoq KNAPK-p Royal Greenlandillu isumaqatigiinniarnerisa unittuuissimaneranut qisuariaataavoq. Taamatut pisoqarnera aalisartunut, ilaqutaannut ingerlatseqatigiiffimmulluunniit pitsaasuunngilaq. Tamanna isumaqatigiissutigisinnaavarput.
Inuilli ilaat qangamut uteqqikkusupput ”taamanikkut akuliuttoqarsinnaalluni”, qanoq pisoqassanersoq naalakkiisoqarluni. Taamatut akuliunnerup kingunerisarpaa Ingerlatseqatigiiffiit ilaat milliardip affangajaanik amigartooruteqarnerat, soorlu 2009-p aallartinnerani taamaattoqartoq inuiaqatigiillu taarsigassarsisariaqarlutik, nunatsinni ingerlatseqatigiiffiit pingaarnersaasa ilaat akiliisinnaajunnaaqqunagu. Ilinniutip taassuma allallu kingornagut paasissallugu pingaartuuvoq taamanikkumiit pisoqangaatsiarsimasoq.
Naalakkersuisut ingerlatseqatigiiffiit ulluinnarni ingerlatsinerannut akuliunneq ajorput; soorlu nipisat suaat kilumut qanoq akeqassanersut, akissarsiat qanoq qaffasitsigissanersut. Suliffeqarnikkut susassaqartut soorlu KNAPK, RG aamma QAK tamanna isummerfigissavaat. Isumaqatigiinniarnermi akisussaaffik naalakkersuisunut miloriutiinnarneqarsinnaanngilaq. Isumaqatigiinniartut taamaaliortitsiniarunik taava isumaqatigiinniarnermi akuusut minnerpaamik ilaasortatik piginnittutillu oqaluttuuttariaqarpaat, nammineq saperlutik imaluunniit akisussaarusunnatik.
Piginnittuunermut politiki
Aqutsisut siulersuisullu akisussaaffeqarput akisussaatinneqarsinnaallutillu. Politikikkut iliuuserisinnaasavut iliuuserisariaqagarpullu tassaavoq isummerfigissallugu ingerlatseqatigiiffiit piumasaqaativut piginnittutullu oqariartuutivut naammassisinnaaneraat, piginnittup ukiumoortumik ataatsimeersuarnermi tunniussai – ingerlatseqatigiiffimmi siulersuisunut.
Maanna piginnittuunermut politikeqalerpugut, ingerlatseqatigiiffiit inuiaqatigiinni akisussaanermut piujuartitsinermullu naatsorsuutigisaat erseqqissarneqarlutik. Piginnittumit taamaallaat piumasaqaataanngillat. Piumasaqaataapputtaaq nunani tamalaani atorneqartut, ingammik ingerlatseqatigiiffik aningaasaliinissaminut taarsigassarsiniassappat. Isumaqatigiissummi naatsorsuutigineqarportaaq qullersaqarfiit aqutsisullu maani nunatsinniissasut.
Ingerlatseqatigiiffinni kisermaassisuni aamma imaluunniit inuiaqatigiinnit pigineqartuni naatsorsuutigineqarportaaq ammanerusumik ersittumillu ingerlatsisoqassasoq. Paasissutissanik unammillernerup aqqani mianernanngitsunik allagaatinik takunnissinnaanermut periarfissaqalernissamik suliaqarneq aallartittariaqartoq. Suliassanut neqeroortitsinermi ammanerunissaq najukkamilu pisuussutinik atuinissaq annertunerusariaqartoq.
Maluginiagassaavortaaq siullermeertumik pisortat sullissineranni piumasaqartoqarmat nunarput pillugu ilisimasaqarneq misilittagaqarnerlu piginnaasatut pingaarutilittut isigineqassasoq. Soorunami! Tamatuma saniatigut siulersuisuni ilaasortaatitatta piginnaasaasa qaffassarnissaat isiginiartariaqarpavut, tamatigoortooqqullugit. Tassalu Nuup Danmarkillu avataanut aamma qiviartarluta. Taamaattariaqarpormi.
Atuaqqikkaanni aamma ingerlatseqatigiiffiit pingaarnertut suut suliassaattut naatsorsuutiginerivut takuneqarsinnaavoq, isumatusaarnerussappallu ingerlatseqatigiiffiit ilaat kattunneqarsinnaapput, soorlu pisortat inissiaatileqatigiivi imaluunniit umiarsualivinnut umiartornermullu ingerlatseqatigiiffiit.
Tamakkuupput oqariartuutini erseqqissarusutakka, takusinnaanngilaralu Siumup anguniagaannut akerliusut imaluunniit ineriartornermut ukiuni tallimani tulliuttuni Namminersorlutik Oqartussat ingerlatseqatigiiffiinut kissaatigisatsinnut.
Neriuppunga ingerlatseqatigiiffinnut politiki nutaaq aqqutigalugu assingusumik pisoqarsinnaanera pinngitsoortinneqarsinnaasoq, Namminersorlutik Oqartussat ingerlatseqatigiiffiata susassaqartullu akornanni naapertuuttumik piumasaqarluni tunisassiaanut naapertuuttumik akiliisoqarluni. Tamannali isumaqanngilaq naalakkersuisut ingerlatseqatigiiffimmik ingerlatsisuussasut.
Ingalassimasussaatitaaneq aallaavigalugu piginnittuusariaqarpugut. Taamatut tunngaveqarneq innarlerutsigu, tamatta erngerluta ”immikkut ilisimasaqartunngussaagut” piumasarpullu malillugu iliorluta, uffa tamakku siulersuisut piginnaaneqarluartut aqutsisullu piffissarujussuaq akissarsiatillu atorlugit suliassarigaat.
Isumaqatigiissummi isumaqatigiinniartut ilaattut isumaqatigiissutip atuarnissaa kajumissaarutigaara. Siumut oqaloqatigiinnissamut piareersimajuarpoq, silaannarmilli tigusaanngitsunik.
Ilisimasavut tunngavigalugit oqaloqatigiitta, taamaassorisavut pinnagit.
Oqallilluarta!