Nipisaat suaat pillugit Royal Greenlandip KNAPK-llu akornanni isumaqatigiittoqarsinnaasimannginnera piaarnerpaamik aaqqiivigineqartariaqartoq Siumut isumaqarpoq
– Suanniarnermi aalisartut siorna nalaataat maanna peqqinnera Siumup assut ajuusaarnartutut isigaa, tassalu Royal Greenlandip KNAPK-llu akornanni piffissaagallartillugu nipisaat suaat pillugit isumaqatigiittoqarsinnaasimannginnera pissutigalugu aalisartorpassuit tunisisinnaajunaartinneqarnerat pitsaanngilluinnartuuvoq, Siumup siulittaasua Erik Jensen oqarpoq.
Killiffik uteqqillugu maanna tassunga ingerlasoqarnera Siumup akuersaanngilluinnarpaa, pingaartumik Nunatta kujasinnerusortaani aalisartut annermik eqqornerlunneqaqqinnissaat akuersaarneqarsinnaanngitsutut isigalugu.
– Taamaattumik suliffeqarfissuaq inuiaqatigiittut pigisarput – aamma aalisartut pineqartut ilanngullutik piginneqataaffigisaat – piaarnerpaamik kaammattorneqartariaqalerpoq isumaqatiginninniarnerit naammassissagaat, Erik Jensen nangilluni oqarpoq.
Suliffeqarfissuup inuiaqatigiinniit pigineqartup, ingerlatseqatigiiffiup ataatsimeersuarnerani kingullermi piginnittuniit piumasaqaataasimasut ilanngullugit, naammassinnissimanersut Naalakkersuisooqatigiinni samminnittoqassasoq Siumumit piumasarineqassaaq.
– Tamanna tunngavigalugu isumaqarpunga, suliffeqarfissuup aalisartunut atugarititai aammalu qallunaat nunaanni sulisorpassuit inissisimatinneqarnerat ilanngullugit, eqqartussallugit piffissanngortoq, Siumup siulittaasua Erik Jensen oqarpoq.