Tunisassiorfeqarneq

Siumup suleqataaffigissavaa tunisassiorneq nunarsuarmi unammillersinnaasoq sumiiffinnilu iluaqutaasoq pilersinneqarnissaa. Aalisakkat naleqarnerulersillugit suliarineqassapput, suliffissaqartitsineq siuarsarneqarluni kisermaassillunilu ingerlatsilersinnaaneq ingalasimaneqarluni.

Nunatsinni tunisassiorneq nunarsuarmioqatigiinnut unammillersinnaassaaq, atasinnaasumik ineriartorfiusumillu ingerlatsinerit tunngavigalugit.

Sinerissap qanittuani tunitsivinnik pitsanngorsaanissaq ineriartortitsinerlu Siumup sulissutigissavaa, unammillersinnaassuseq aamma nunatsinni immitsinnut pilersorneq annertusarneqaqqullugit. Sumiiffiit ilaanni tunitsiviit ullutsinnut naleqqutinngitsut sumiiffimmilu atuisunut naleqqussarneqarsimanngitsut ingerlanneqartarput. Taamaattumik innuttaasut suleqatigalugit periarfissallu aallaavigalugit tunitsiviit iluaqutaaneruleqqullugit siuarsaasoqassaaq.

Aalisakkat nalitunerulersinneqarnissaat pisariaqarmat, tunisassiat atuisumit pisiarineqarsinnaasunngorlugit suliarineqartarnissaat anguniarneqartuassaaq. Tunisassiorfiit pillugit ataatsimiititalianik illoqarfinni nunaqarfinnilu pilersitsinissamik Siumut sulissuteqassaaq, aalisartut, sulisut, atuisartullu peqataatinneqarnissaat qulakkeerlugu.

Siumup anguniarpaa avataasiortunut pisassiissutit tunniunneqartillugit sumiiffimmi naleqarnerulersitsinissaq siunertaralugu pisassiissutit ilaat suliareqqinneqartussatut tulaanneqartassasut, taamaalilluni naleqarnerulersitsineq, suliffissaqartitsineq kiisalu sumiiffimmiit avammut tunisassiorneq siuarsarneqarsinnaaqqullugit.

Nunap immikkoortuini tunisassiorneq pillugu kisermaassisumik ingerlatsisoqarnissaa Siumup akuerinngilaa – unammilleqatigiinneq qularnaarneqarsimaneqartuassaaq.

Aalisakkanik tulaassisussaatitaaneq sinerissap qanittuani avataasiorlutillu aalisartut akornanni oqimaaqatigiissinniarlugit naleqqussaasoqartassaaq, naleqarnerulersitsineq eqqarsaatigalugu ajoqusersuutaanngitsumik.