Pisuussutit uumassusillit iluaqutigineqarnerini piujuaannartitsinermik tunngaveqarluni atuineq aqutsinermi tunngavigineqassaaq.
Pinngortitaq pisuussutillu uumassusillit illersorneqarlutillu piujuaannartinneqassapput, kinguaariinnut tulliuttunut iluaqutaanerat nuannaarutaanerallu ullumikkornit annikinnerulersikkumanagu.
Silaannaap allanngoriartornerata Kalaallit Nunatsinni pisuussutitsinnut uumassusilinnut sunniutai pillugit misussueqqissaarnerit ilisimatusarnerillu ingerlaavartuunissaat qulakkeerneqassaaq.
Atuisut ilisimasaat ilisimatuussutsikkullu ilisimasat pisassiisarnermi oqimaaqatigiinnerusumik atorneqarnissaat anguneqassaaq. Atuisut ilisimasaasa qanoq atortinneqarnissaat pillugu periusissiortoqassaaq.
Pisuussutit uumassusillit pisarineqartartut tamakkiisumik atorluarneqartarnissaat nunamullu tamarmut iluaqutaanissaat siunertaajuassaaq. Tamanna aamma isumaqarpoq, pisuussutit uumassusillit ullumikkut tamakkiisumik atorluarneqanngitsut, inuaqitigiinnut iluaqutissanngorlugit atorluarneqalernissaat siunnerfigalugu isumatusaartumik suliniuteqarnissaq.
Pisuussutit atorneqarnerini aalajangersaanermi aalisartut piniartullu ilisimasaat kiisalu ilisimatuussutsikkut paasisat katersorneqartartut tunngavigineqartassapput, aalajangersaasarnernilu kattuffiit attuumassuteqartut isumasiorneqartassallutik.
Pisuussutinik pinngortitamillu atuineq eqqarsaatigalugu innuttaasut paasisimasaqarnerat annertusarneqassaaq Pinngortitaleriffik, kattuffiit, suliffeqarfiillu suleqatiginerisigut.
Pisuussutit uumassusillit tamaasa nunatsinni pisortat oqartussaaffigaat, namminerlu aalajangiiffigisartussaallugit, aammalu nunatsinni innuttaasut ileqqorissaartumik pisuussutinik uumassusilinnik atuinissaat aqqutissiuutissallugu.
Nunat sanilitta imartatsinni pisuussutitsinnik atuinerisa aqunneqarnera suleqitigiinnikkut nukittorsarneqassaaq, tamatumani qulakkeerneqassaaq nunatta imartani pineqartuni naligiimmik naapertuuttumillu pisassiissutigineqartuni pissarseqataasarnissaa.
Pinngortitaleriffik suliassatigut aningaasaqarnikkullu nukittorsarneqassaaq, nunatsinni kattuffiit susassaqartut nunallu allat suleqatigalugit, pisuussutinik uumassusilinnik atuinerup annertusiartornera ilutigalugu.
Nunatsinni pisuussutit uumassusillit, imarmiuuppata nunamiuuppataluunniit, peqqissusaasa pisortatigoortumik ingerlaavartumillu misissuiffigineqartarnissaat Siumup sulissutigiuarpaa. Nunatsinnimi uumasut nerisaqaqatigiinnerup kingunerisaanik nappaataasinnaasunik siaruarterisarsinnaanerat pinngitsoortinneqartariaqarpoq.
Inuiaqatigiittut pisuussutivut uumassusillit pinngitsoorsinnaanngilavut, taamaammat peqqinnissaq eqqarsaatigalugu uumassusillit malinnaaffigeqqissaartarnissaat
pisariaqarluinnarpoq.
Sinerissami piniarnermik aalisarnermillu inuussutissarsiuteqartut silaannaap, immap sarfaasa, pinngortitap avatangiisillu allanngoriartornerisa malitsigisaannik inuussutissarsiutaasa allanngoriartornerat ilutigalugu inuutissarsiornermikkut naleqqussartuarnerannut Siumut aqqutissiuusseqataajuassaaq.
Aalisartut piniartullu ilisimasaat nunarsuarmioqatinut paasissutissiissutigisarnissaat Siumup suleqataaffigissavaa.
Pinngortitaleriffik nunatta avannaani immikkoortortaqalissasoq Siumup anguniarpaa.