Naalakkersuisut namminneq kissaateqarnerat naapertorlugu, silaannartatsinnik nakkutilliineq nunatta nammineq aqulertussaassavaa. Nunatta Kujataanut nakkutilliisoqarfik inissinneqarpat, Atlantikup Avannarpasissuata ilarujussua ilanngullugu timmisartunik aqutsivinngorsinnaavoq
All.: Karen Marie Kyed Frederiksen, Kommune Kujallermi kommunalbestyrelsimut ilaasortaq, Siumut
Naalakkersuisut kissaatigisaat naapertorlugu danskit naalakkersuisui Islandimut Canadamullu isumaqatigiissuteqarsimapput, Kalaallit Nunaata silaannaata nakkutigineqarnera nunatsinnit tiguneqassasoq, silaannartatsinnik aqutsineq nunatsinnut inissinneratigut.
Naatsorsuutigineqarpoq silaannartatsinnik aqutsivik nutaaq nunatsinni najugaqavissunut 100-nut suliffissaqartitsissasoq, aamma ilimagineqarpoq aqutsiveqarfik nunatsinnit tamakkiisumik 2031-imiit aqunneqalerumaartoq.
Ineqarnermut Attaveqaasersuutinullu Naalakkersuisoq, Erik Jensen, isumaqatigiissutissap pilernerani oqarpoq, nunatsinni timmisartunik qulaassisunik nakkutilliisoqarfimmik pilersitsineq nuna tamakkerlugu mittarfissanik nutaanik sanaartornermut iluaqutaasasoq aamma nunatta innuttaasa timmisartuussinikkut mittarfeqarnikkullu piginnaaneqarnerulernissaanik malitseqassasoq. Erik Jensenip ilanngullugu pingaartippaa, Islandip Canadallu silaannartatsinnik nakkutilliisoqarnikkut qanimut suleqatigiinnerat ingerlaqqissasoq.
Danskit angallannikkut ministeriat, Trine Bramsen ilanngulluni oqarpoq, pissusissamisuuginnartoq nakkutilliineq nunatsinnut nuunneqarpat, tassami nunatta silaannartaata inissisimanera naalakkersuinikkut annertuumik pingaaruteqarluni inissisimammat.
Naalakkersuisut pilluaqquakka isumaqatigiissummut kusanaqisumik angusaqarnerannut, tamannami timmisartuussinikkut silaannakkullu angallassinikkut piginnaasannik inerisaanermik ajunngitsumik kinguneqassammat.
Isumaqatigiissut nunatta inerisaqqinnissaannut suli annertuumik periarfissaqartitsivoq. Tamanna piviusunngortinneqarsinnaavoq silaannartatsinnik nakkutilliisoqarfik nutaaq Kujallermi inissinneqarpat. Taamaalillutik qinikkat Inatsisartunut qinersinermi kingullermi neriorsuutitik eqquutsissagaluarpaat, tassami neriorsuutigimmassuk nunatta kujataani immikkut ittumik iliuuseqartoqarumaartoq, nunatta kujataani inerisaanissanik pilersitsinikkut.
Nunatta Kujataanut nakkutilliisoqarfik inissinneqarpat, Atlantikup Avannarpasissuata ilarujussua ilanngullugu timmisartunik aqutsivinngorsinnaavoq, Nunattalu nunatut inissisimaffiata naalakkersuinikkut pingaaruteqassusaa suli pingaarneruliinnarluni, tamannalu pissappat nunatta kujataani inissiinikkut ajunnginnerpaamik pisinnaavoq.