Avannaata kommuniani innarluutilinnut sullissineq nukilaaffigineqarpoq. Kommunalbestyrelsip pisussaaffigaa illersuisumik pilersitsissalluni. Soqutiginnittunullu pikkorissaasoqartariaqarpoq
Allattoq: Paarnannguaq Mathiassen, Ilulissat
Avannaata kommuniani inunnut innarluutilinnut sullissineq ukiorpaalunngortuni nukilaaffigineqarsimasoq ilisimavarput. Tusagassiuutitigullu ukiuni kingullerni kommunimi inunnut innarluutilinnut sullissinermi sumiginnaaneq saqqummiunneqartarsimalluni.
Kommunalbestyrelsip pisussaaffigaa illersuisunik pilersitsissalluni, inunnut innarluutilinnut tapersersorneqartarnissaannik inatsisartut inatsisaat nr. 13, 12. Juni 2019-meersoq paragraf 24 malillugu.
Inuit innarluutillit taakkununngalu akisussaasut ulluinnarni sullinneqarnerminni aqqutissiuunneqarnissartik, illersorneqarnissartik, pisinnaatitaaffimminnik ilisimasaqarnissartik, naammagittaalliornissamullu periarfissaqarnertik qularnaatsumik ilisimasussaavaat.
Taassuma saniatigut inunnut innarluutilinnut siunnersuisooqatigiit aamma pilersinneqartariaqarput, inuit innarluutillit taakkununngalu sugisaasut ulluinnarni atugaat, isummersuutaat, oqariartuutaallu tusaaneqartariaqarput!