Timersorneq
Timikkut anersaakkullu peqqinnerput nukittorsarneqassaaq — meeqqat inuusuttullu sunngiffimminni periarfissarissaassapput.
Inuiaqatigiit timikkut anersaakkullu peqqissut pilersinneqassapput, ilaatigut timersornikkut periarfissat annertusarneqarnerisigut.
Siumup, Kalaallit Nunaanni Timersoqatigiiffiit Kattuffiata anguniagaa ‘Aalasa’, ukioq 2030 nallertinnagu nunatta nunarsuarmi timimik aalatitsiffiunerpaanngornissaa, tapersersorpaa.
Nunaqarfinni timersornikkut kulturikkullu ineriartortitsinerup nukittorsaavigiuarnissaa ilutigalugu timersortarfeeqqanik / katersuuffigisinnaasunik nunaqarfinnut naleqquttunik sanaartornerup ingerlaqqinnissaa Siumup pingaartippaa. Nunaqarfinni sunngiffimmi sammisassaqartitsivinnik, ukioq tamaat atorneqarsinnaasunik pilersitsisarnissaq Siumup anguniagaraa.
Timersornermut Højskolimik nunatsinni pilersitsisoqarnissaa suliniutaavoq, pilersitsisoqareeraluarpalluunniilli nunani allani timersornerup tungaatigut ilinniarfiit suleqatigalugillu ineriartortitsiuarnissaq ingerlanneqartariaqarpoq.
Qimusserneq kulturitoqqamik tammatsaaliuineruvoq, taamaattumik Siumup pingaartippaa qimussertartut kattuffiat suleqatigalugu qimussertarnerup tammatsaaliorneqarnerata sulissutigineqartuarnissaa.
Meeqqanik inuusuttunillu sungiusaasut aqutsisullu pitsaanerusunik atugassaqarnissaat Siumup aqqutissiuutissavaa. Meeqqat inuusuttullu sunngiffimminni peqqinnartunik sammisaqarsinnaassapput timersorneruppat, kulturikkut sulineruppat, inuusuttunulluunniit sammisaqartitsineruppat, soorlu nipilersornerit assigisaallu ilanngullugit. Sunngiffimmi ilinniartitsinerit nukittorsarneqassapput.
Nunatsinni timersornerup inuussutissarsiutitut ingerlanneqarsinnaalernissaata periarfissarsiuunneqarnissaa sulissutigineqassaaq, Nunatta nunanut allanut unammisartuisa timersornikkut periarfissaqarluarnissaat ilanngullugu.
Nunatta erfalasua atorlugu OL-imi nunarsuarmioqatillu unammiuaarnerini allani peqataasoqarsinnaalernissaa Siumup anguniarpaa.
E-sport timersuutitut allatuulli isigineqarluni tapersersorneqassaaq.