Qaannap atoqqilernissaanik pilersitsisoq Themothæus Poulsen akornatsinniikkunnaarpoq.
All.: Erik Jensen, siulittaasoq, Siumut
Ukiorpassuarni Siumumi suleqataasimasoq aammalu Siumup Inuusuttaanik SIS-imik pilersitseqataasimasoq, kiisalu nalimini inuusuttunik qiimmassaasoq, aqqutissiuussisoq aammalu siulitta ileqqutoqaannik, periusiinik inooriaasiannillu ataqqinnilluni piviusorsiortumik suliniutilik sivikitsumik Sisimiut napparsimaviani uninngareerluni toqukkut qimaguppoq.
Themothæus Poulsen, Timuutu, imminut nittarsaattuunngilaq, imminullu persuarsiutigisuunani; taamaattoq siulitta ileqqui pineqaleraangata tassaavoq anersaakkut uummarissaasoq timitalersuisorlu.
Inuiattut ullorsiornerit, Ullortuneq imaluunniit Ullukinneq pineqarpat, taava Timuutu tassaavoq nalliuttorsiutiginninnermik pingaartitsisoq ataqqinnittorlu.
Taanna anersaaq toqqammavigalugu Timuutup qaannamik aallussineq piviusorsiortumik suliniutigilerpaa, soormi siulitta inooriaasiannik pigiinnarnissaannillu tunngaviliisoq. Qajaq sutut alutornartutut takornartutullu Katersugaasivimmi isiginnaaginnassavarput!
Peqatigiiffik Qajaq Nuummi nalimini inuusuttoqatini peqatigalugit pilersippaa, erngertumillu sinerissamut siammarpoq untritilinnillu arlalinnik ilaasortaqalerluni.
Kingorna qajartortarnerup nalaani Naleqqat pillugit suliniuteqalerpoq paasissutissanillu nammineq angallatini atorlugu utoqqaat suli ilisimannittut inuugallartillugit apersorpai paasissutissanillu katersiffigalugit.
Suliniutimini qanimut suleqatigilluarsimasaasa tapersersortaasalu ilagisimavaat ataqqinartoq Naalakkersuisut siulittaasorisimasaat Jonathan Motzfeldt, kiisalu ilisimatuutut peqatigisarsimavaa HC Petersen, aammalu inuit allat suli maannamut akornatsinniittut peqatigilluarsimavai qujassutissaqarfigalugillu.
Matumuuna ilaqutai, nulia qanigisaalu tamaasa misiginneqatiginnissummik apuussiffigerusuppagut. Timuutup anersaava toqunngisaannassaaq, qajaq siulittalu piusii ileqquilu suli pigigallartillugit akornatsinniittuassaaq.
Timuutup eqqaaneqarnera ataqqinartuuli.