Tasiilap immikkut kommuninngoqqinnissaa siunertaralugu innuttaasut taasinissaannut periarfissiinissap aqqutissiuunneqarnissaa pisariaqarpoq piffissanngorlunilu. Taamaattumik Kommuneqarfik Sermersuummut siunnersuutigaara, sumiiffimmi innuttaasut taasisinneqassasut
All.: Mala Høy Kúko, Sermersuummi kommunalbestyrelsimut ilaasortaq, Siumut
Tasiilaq immikkut kommunitut inissisimajunnaarmalli ukiuni kingullerni arlaqalersuni Tasiilap ineriartornera arlalitsigut aporfissalersorneqartutut illuni unittoornikuuvoq. Ilungersunarnerpaavorlu sumiiffimmi innuttaasut ungasissumiit qitiusoqarfimmiillu aqunneqalersimammata, soorlu aamma taamak nunasiaataasimanerup nalaanni nunarput Københavnimiit aqunneqarnikuusoq assigalugu.
Tasiilaq namminerisaminik kommunitut ingerlagallarmat illoqarfittut kiisalu aamma nunaqarfittaminut ineriartortitsineq naammaginartumik ingerlanikuusimavoq. Kangiani aalisartut piniartullu inuuniutaannik kommuniminni qinikkaninngaanniit malunnartumik kulturikkut qanga siulimik periuserisimasaanni ukiorpassuarni aallunneqarsimasunit taperserneqarluarlutik illersorneqartuartarsimapput.
Tamannami kommunimi qinikkat pisussaaffittut annertuutut isigalugu akisussaassuseqarlutik ingerlattarsimavaat. Ullumikkullu malunnarsisimaqaaq annertunerusumik illersuisussaarussimasut.
Ineriartorneq unittoq
Tasiilaq kommuniugallarmat politikeriusimasut nalaani illoqarfittut ineriartornissaq pilersaarutaasut malillugit ingerlatsisarsimapput. Tupinnanngitsumik pingaartillugu innuttaasut ilaqutariit, tikeraat suliartortut aamma nunaqarfiit illussaqarniarnissaat aallaavigineqartarsimavoq. Meeqqat pinnguartarfeqarnissaat isumagineqartarsimavoq. Sulisartut namminersortut suliassaqarnissaat kommunalbestyrelsip pingaartillugu ingerlatarisimavaa.
Ajoraluartumillu kommunerujussuanngornitta kingunerisaanik pissutsit allanngorujussuarsimapput, illoqarfiup kiisalu nunaqarfigisaasa ineriartorsimanerigaluat unittuuittutut oqaatigineqarsinnaavoq. Illoqarfiup nunaqarfittaasalu ineriartorunnaarnerata kingunerilersimavaa, innuttaasut arlaqartut nunartik alliartorfigisimasartik asangaagartik suliffissaqannginnertik tamatumalu kingunerisaanik pilersuisinnaajunnaarnermik pissutigalugu uummatertik anniartingaarlugu aalajangertariaqartarsimasut qimassallugu. Illoqarfinnullu annerusunut periarfissaqarnerusunut nuunnissaminnik periarfissittarlutik.
Isumaqaraluarama G-60 qangali qaangereersimagipput, kisianni kommunit aaqqissuuteqqinneqarnerisa kingunerisaanik oqannguarata G-60 nutaaq uagut nammineq ingerlatilersimavarput.
Periarfissaarutsitsiartorneq
Taamatut Tasiilaq kommunerujussuup ataaniitsillugu naammaginanngitsumik ineriartorujuuginnassappat siunissami naatsorsuutigineqassavoq innuttaasut inuusuttaminnut ilinniarsimassutsikkut naammassigaluarlutik periarfissaasuaneq peqqutaatillugu allanut illoqarfinnut nutsertuarnissaat. Ukiunimi arlaqalersuni tamanna nunaqqataasut misillerfigereernikuuaat sukkasuumik, iliuuseqartoqanngippallu suli nangittumik nutserneq ingerlanneqassalluni.
Tasiilaq nunaqarfittaalu eqqaassagaanni innuttamigut amerlassutsimigut qangangaatsiarli uninnikuupput, nunaqarfittaasa ilai inuerukkiartuaarput sukkasuumik, illorpassuillu inuttassaqarnatik napasut amerliartorusaaginnarput. Illoqarfimmi nunaqarfittamigullu ineriartunngitsoq suliffissaqartitsinngitsorlu inuttamigut amerliartornavianngilaq. Tamanna sumiluunniit atuuttuusoq ilisimavarput.
Kisiannili illua tungaani Nuuk qiviassagaanni nutserfigineqarnera ingasattumik pivoq. Tamanna tupinnartuliaanngilarmi innuttamigummi amerlassutsimigut 30.000-inngornissaq anguniagaammat. Sanaartornerujussuaq ingerlanneqarmammi sumi tamaninngaanniit nutserneq ingerlajuartuuvoq.
Taasisitsineq aqqutaasaaq
Taamaammat siunnersuutigaara Tasiilami nunaqarfittaanilu innuttaasuusut aperineqartariaqartut qanoq illoqarfittut nunaqarfittatillu eqqarsaatigalugit ineriartoqqissagunik immikkut kommunitut inissisimalernissartik eqqarsaatigineraat.
Politikikkut paasisariaqarparput innuttaasuusut Tasiilap eqqaani qanoq kommuninngoqqinnissamut takorluugaqarnersut. Kommunerujussuarmut ataannarusunnersut imaluunniit imminut kommuninngoqqinnissaminnut tikkuusserusunnersut.
Tamannalu innuttaasut qinersineratigut paasisariaqarparput. Isumaqarpunga demokrati aqqani innuttaasut periarfissinneqarnissaat isumaqatigineqartariaqartoq. Innuttaasut taasineratigut inernerata takutikkumaarpaa politikerit alloriarnissap tullianut ingerlaqqinnissaat qanoq isikkoqarumaarnersoq.
Tasiilami nunaqarfittaanilu qineqqusaarnermi kingullermi tamanna annertuumik oqariartuutigalugu innuttaasunut anngunnikuuarput. Neriuppunga siunnersuutigisara kommunimi ilaasortani paasineqarluni isummersorfigineqarluarumaartoq.
Uani Ittoqqortoormiormiut uunga peqataarusunnersut aperineqarsinnaapput.