Piffissami kingullermi aalisartut saarullinnut akigitinneqartut pillugit naammagittaalliornerat tunngavigalugu Siumup paaserusuppaa, ilumut Royal Greenlandi KNAPK-mut oqaloqateqarnissamut piumassuseqarnersoq.
Saarulliit akiisa apparsimanerat pillugu KNAPK oktobarip aallaqqaataanni akerliussutsimik takutitsivoq, oqariartuutigalugu pissutsinut politikikkut iliuuseqartoqartariaqartoq. Naalakkersuisullu avammut akissutigisartagaat eqqarsaatigalugit, Siumut isumaqarpoq Naalakkersuisut iliuuseqarnerunissamik pisussaaffeqartut.
Ilanngullugu Siumup maluginiarpaa, KNAPK-p kattuffittut akit pillugit isumaqatiginninniartussatut inissisimanini atornerunagu, ukiuni kingullerni toqqaannaq politikikkut iliuuseqaqqusisarneq atornerulersimagaa.
Pissutsit taamaannerat Siumup ima paasivaa, isumaqatiginninniartussat akunnerminni annertuumik aaqqiagiinnginnermik peqartut, aalisartullu kattuffiata oqariartornera naapertorlugu suliffeqarfik inuiaqatigiit pigisaat, Royal Greenlandi, oqaloqatiginninnissamut annerusumik piumassuseqartanngitsoq, tamannalu ilumoornersoq Siumup paaserusuppaa.
Siumut isumaqarpoq isumaqatigiinniarnissamik suliassaq illuatungeriit tamarmik pisussaaffittut isigalugu ingerlatissagaat, taamaammallu KNAPK aamma RG pineqartoq pillugu isumaqatigiissuteqarniarlutik naapeqatigiittariaqartut. Suliffeqarfissuarlu inuiaqatigiinni pigisarput akimmisaartitsisimappat, Naalakkersuisut piginnittutut tassani aqqutissiuinissaminnut pisussaaffeqartut Siumut isumaqarpoq.
– Pissutsit qanimut malinnaavigaavut, Siumullu naliliivoq, illuatungeriit oqaloqatigiissinnaannatik inissisimarpalunnerat ilungersunartoq, taamaattumillu piginnittut sinnerlugit Naalakkersuisut Siulittaasuat pisussaaffeqartoq. Saarullinniat pineqarput, taakkulu akilernerlunneqartutut misigisimanerat piaarnerpaamik qaangerneqartariaqarpoq, Siumup gruppiani siulittaasoq, Karl Tobiassen oqarpoq.