Kulturi, inooriaaseq, inunnik ataatsimoorfiulluni pigiliunneqarsimallunilu atorneqaraangami nukitunerulersitsisarpoq. Siuligut taamak inooriaaseqarsimasut sulisimasullu nalunngilavut, uagullu aamma suliassaqarpugut.
All.: Paarnannguaq Mathiassen, Siumut Ilulissat
Kulturikkut immikkooruteqarnerput ataatsimoorussaqarnerpullu ersarissunngortinneqarneraluni nukittorsarneqassappat, kulturilerisut aamma sumiiffinni takornarialerisut ataatsimoorlutik takorluukkaminnik suliniuteqarlutillu anguniagaqartariaqarput. Taamaappoq aamma uagut inuiaqatigiinni inooqataasuusugut.
Takornarialerineq pineqartillugu kulturi avaqqukkuminaatsorujussuuvoq. Tassani ilisimasanik avitseqateqarneq piginnaasanillu kivitsineq nukittooq pilersinneqassappat, pitsaassuseq, isumannaassuseq piujuartitsinerlu qitiutillugit ilusilersorneqarlunilu pilersaarusiorfigineqartariaqarput.
Sumiiffitsinni suut takutikkusuppagut? Suut misigitikkusuppagut? Qanorlu eqqaamaneqarusuppugut? Suut ullutsinni pigiliullugit atukkatsinnut tunngatillugu kulturitsitut takutikkusupparput? Sunaana inuiannut allanut sanilliulluta tulluusimaarutigisinnaasatsinnik ulluinnarsiutigisatsinnillu immikkoorutigigipput?
Sumiiffitsinni kikkut piginnaasanik naleqquttunik peqarpat? Taakkalu qanoq suleqatigineqarsinnaappat?
Kulturi pillugu siunnersuisoqatigiit
Taamaammat sumiiffinni kulturi pillugu siunnersuisoqatigiit pilersinneqartariaqartut isumaqarpunga.
Pisortat ingerlataattuunngitsoq, inuilli namminneq kajumissuseqarlutik tulluusimaaruteqarlutillu ingerlataannik, pisortallu ikorfartugassarisassaanik. Tassani takornariaqartitsinermik siunnersuisooqatigiit qanimut suleqatigiiffiusinnaasunik aammalu ineriartortinneqarsinnaasunik ataatsimoorlutik suliniutinik anguniagaqarnissaat alloriarfigineqarsinnaavoq.
Inuiaqatigiit kalaallit; nunagisaminni kulturikkut, anersaakkut isumaliortaatsiminnillu kiffaanngissuseqarlutik inoorusuttut tusaaneqarlutillu ataqqineqassappata, politikikkut ingerlatsinermi oqartussaaqataanerat nukittorsarneqarluni.
Nukik uagut nammineq pigaarput, atorluassavarpulli. Kikkut peqataarusuppat?