Allattoq: Siumut Folketingimi
Siumup Folketingimi ilaasortaatitaa Aki-Matilda Høegh-Dam Folketingip oqaluttarfiani kalaallisut oqalugiareernermi kingorna tusagassiorfinnit assigiinngitsunit sammineqarluarpoq sapaatip akunnerani matumani.
Naalagaaffeqatigiinneq pillugu Folketingimi oqallittoqarpoq tallimanngornermi maajip aqqaneq aappaanni. Oqallinnermut atatillugu Siumup Folketingimi ilaasortaatitaa Aki-Matilda Høegh-Dam oqaluttarfimmiinnermini oqalugiaatini Kalaallit Nunaanni pisortatigoortumik oqaatsit atorlugit oqalugiarpoq.
Naalagaaffeqatigiinneq piviusunngitsoq oqalugiarnermini erseqqissaqqippaa.
”Aatsaat Naalagaaffinngornikkut Naalagaaffeqatigiinneq pisinnaanngussaaq”, Folketingip oqaluttarfianit kalaallisut naqissusiivoq.
Aki-Matilda Høegh-Damip kalaallisut oqalugiarnera ilisimaneqareersutut tusagassiorfinnit assigiinngitsorpassuarnit malinnaaffigineqarpoq. Aki-Matilda Høegh-Dam Nunatsinnit, Danmarkimit aamma nunanit allanit tusagassiortunit oqalugiaatini pillugu apersorneqaqattaarpoq.
Naak kalaallisut oqalugiarnera annertuumik suliaqarfiugaluartoq, suliassanik allanik aamma sapaatip akunneri kingulliit imaqarluarput.
Siumut Folketingimi allattoqarfia Kalaallit Nunaannit atuartunit pulaarneqarpoq, Aki-Matilda Høegh-Dam NunaGreenimik ataatsimeeqateqarpoq kiisalu kalaallit arnartaannik spiralilersuisoqarsimanera pillugu aamma apersorneqarluni.
Sapaatip akunnerani matumani illersornissamut ministeriugallartumit Troels Lund Poulsenimit, Venstremeersumit, Siumup allattoqarfia pulaarneqarpoq.
Tassani illersornissaq pillugu isumaqatiginninniartoqarnissaanut atatillugu Aki-Matilda Høegh-Damilu eqqartueqatigiipput.
Aki-Matilda Høegh-Dam Luxembourgiliarluni tallimanngornermi maajip 19-ani aallarpoq. Folketingimi ataatsimiititaliami NATO-p Inatsisartuinut ilaasortaanerminut atatillugu Luxembourgimi ataatsimeeqataassaaq akunnerup naanerani.
Luxembourgimiinnermini arlaleriarluni ataatsimiinnernut peqataassaaq. Sapaatip akunnerata tulliani Københavnimut utissaaq.