Takornariaqarneq

Siumup takornariaqarneq amerlanerpaanut iluaqutaasumik ineriartortikkusuppaa – inuiaqatigiinni kulturi, inooriaaseq avatangiisillu tunngavigalugit. Takornariaqarneq suliffissanik pilersitsiviussaaq, kalaallillu taakkuussapput aqutsisut.

Siumup takornariaqarneq inerisaanissamut periarfissatut pingaarutilittut isigaa, tamannalu inuiaqatigiit kulturiannik, inooriaasiannik avatangiisinillu illersuinermik aallaaveqartumik ingerlanneqassaaq. Nunatsinni takornariaqarneq najukkani pissutsinut tulluartumik aaqqissuunneqassaaq.

Takornarialerinermi ingerlatsinermut sinaakkutit innuttaasunut naleqqussarneqassapput, nunatsinnilu namminersortut, aningaasaliisartut takornarialerisullu salliunneqassapput. Inuussutissarsiut imminut napatissaaq suliffissanillu pilersitsiffiussalluni, avatangiisinut eriaginninnermik piujuaannartitsinermillu aallaaveqartumik.

Nunaqarfinni takornarialerinermik inuussutissarsiuteqarneq annertusarneqassaaq. Periusissiaq nunap immikkoortuini tamanut peqataatitsisumik suliarineqassaaq, innuttaasut amerlanerusut peqataasinnaaqqullugit. Unnuisarfiit ineriartortinneqassapput aamma pikkorissaaneq aqqutigalugu periarfissat amerlanerusut pilersinneqassapput, takornariat amerliartortussatut naatsorsuutigineqartut angummaffigisinnaaqqullugit.

Takornarialerinermi suliallit piginnaaneqarnerulersinneqassapput, aningaasaliissutit aamma siunnersuineq sineriatsinni annertusarneqarneratigut.

Takornariaqarnerup iluani sulisut suliffeqarfiillu nunatsinni toqqammaveqarlutillu angerlarsimaffeqassapput, piginnittut amerlanerussuteqartut maani najugaqartuunerisigut. Avataaniit aningaasaliissutit tikilluaqquneqarput, taamaallaalli maani najugaqartut piginneqataassutsinik aqutsisuuppata.

Pisortat suliffeqarfiutaat takornarianik sullissisunut namminersortunut tapersersuisuussapput, ajornanngippat immikkut ittumik piorsaanissamut isumaqatigiissuteqarnikkut. Nunap immikkoortui imminnut kivittut pisortat suliffeqarfiutaanit unammillerneqassanngillat.