Avannaata Kommuniani sanaartugassanut missingersuusiortarnermi inuttussuseq aallaavigalugu aningaasalersuisarneq naleqquttuunngitsoq kingullermik kommunalbestyrelsi ataatsimiimmat takuarput
All.: Jens Kristian Therkelsen, Avannaata Kommuniani Siumup Gruppia sinnerlugu
Maannakkut Avannaata Kommuniani ikannerussuteqarlutik borgmesteriutitaqartut 2021-mi ukiup tullissaanut missingersuusiornermi amerlanerussuteqarnertik aallaavigalugu aalajangerput, sanaartugassanut aningaasalersueriaaseq inuttussuseq aallaavigalugu aqutsiveqarfikkaartumik procentilersuisoqartalissasoq.
Taamatut aalajangiinnginnermi Siumut ersarissumik akerliulluta oqaaseqaateqarpugut, tassa aarleqqutigalugu kommunitsinni ineriartornerup assigiinngippallaamik ingerlalersinnaanera aarleqqutigalutigu, ilaatigut assersuutiginikuullugu Qaanaaq nunaqarfittai ilanngullugit, sanaartugassat 7%-tiinnaanik pisalertussaq. Inerisarnissaanut sanaartugassat taamak ikitsigisut aningaasaliissutaasalissappata taakkua naammattussaanngimmata allaat tamanna kinguneqarsinnaasoq sanaartornerup unilluinnarsinnaaneranik, kiisalu Kommunerujussuit pilersinneqarnikuummata siammasissumik kivitseqatigiinnissap nukittorsarneqartariaqarnera ilaatigut pissutigalugu.
2020-mi sanaartugassanut kissaatit seminareqarnermi saqqummiunneqarput, taamanikkullu Upernavik nunaqarfittaalu 400 mill. sinnerlugit sanaartugassanut kissaateqartut paasinikuuarput. Taakku piviusunngornissaat suli ukiorpassuarni ingerlasinnaasoq oqaatiginikuuarput, periutsip allanngornerata kingorna
Avannaata Kommunia massakkut annertuumik aningaasaqarnikkut ajornartorsiorpoq sakkortusisamillu nakkutigisaalluni.
Taamaammat ukiut atukkagut eqqarsaatigalugit sanaartugassanut missingersuutit ikiliartuinnartut takusinnaavagut,tamanna assut eqqarsarnarpoq Kommunitsinni aningaasarsiornerup ingerlalluaruttorfiani, suliffissaaleqinerup appasinnerpaaffiani taamatut inissinnerup kingorna sanaartugassat ukiup tullissaanut 70 mill. missaaniissanut siunniunneqarpoq. Tamatumalu kingunerisaanik Ilulissani utoqqaat illuata allinissaanut (Siumumiik isumaqatigisatsinnut) aningaasanik Namminersorlutik Oqartussallu avitseqatigiiffiusussanik pisoqalermat inuttussuseq aallaavigalugu missingersuusiortarneq atorsinnaanngitsoq paasineqariasaarpoq.
Tassami Ilulissanut 47 %-i aallaaviusussaq 52 %-imut inissimmat, taamaasillunilu Kommunalbestyrelsip aalajangersimasaa atuussinnaanngitsoq paasineqarluni.
Suleqatigiit oqariartuutigigaluarpaat 2025-mi aqutsiveqarfiit Ilulissat avataaniitut annertumik pissarsissasut, tamanna tusaannarlugu kusanaraluarpoq, kisiannili pissusiviusut qiviaraanni aammalu maannakkut Kommunip aningaasameernerata nalaaniimmat siumungaaq taamatut oqariartorneq inissaminiinngitsoq isumaqarfigaarput.
Tassami 2025-mut sanaartukkat pitoriikkat 37,5 mill. Ilulissanut pioreermata, taamaasilluni Kommunip aningaasatigut kivinneqarnissaa ukiumi ataasiinnarmi pisinnaanera ilimanaateqarpallaanngimmat sanaartornermut ukioq mannatuut aningaasaliisoqarsinnaanera pissusissamisoorpoq takorluussallugu,tassa 70 mill.
Tamannalu pissappat inuttussuseq aallaavigalugu Ilulissanut tuttussat 50 % qaangereerpaat, taamaasilluni ilumut atuutissanersoq nalunartorujussuuvoq.
Siumumit ilungersuutiginikuusarput aammalumi ukiorpassuarni atorsimasoq tassalu pisariaqartitsineq aallaavigalugu sanaartugassanut missingersuusiortarnerup ingerlaannarnissaa avaqqussinnaanngitsoq takuarput. Assersuutigalugumi Qaanaami utoqqarnut illuliortoqassagaluarpat imaluunniit sanaartugassamik annertuumik allamik sanaartortoqassagaluarpat maanna sanaartornermut missingersuusioriaaseq atorsinnaanngitsoq takugatsigu.
Siumumit pingaartipparput sumiluunniit pisariaqartitsineq piusoq aallaavigalugu inerisaaneq ingerlanneqassasoq, sumiinnera apeqqutaatinnagu, kisiannili Kommunitut atituumik kivitseqatigiilluta siammasissumik ineriartortariaqartugut kissaatigilluinnaratsigu.
Pisup takutippaa isummersuutigut eqqortuusimasut, suleriarnissallu tulliuttut eqqarsaatigalugit pisarnitsitut suleqataassalluta piareersimassaagut, pingaartipparpummi sumi najugaqarneq apeqqutaatinnagu Kommune ineriartortinneqassasoq.