Avannaata Kommunia 2018-mi pilersinneqarmalli aattaat taama aqutsinikkut pitsaanngitsigisumik ingerlanneqarpoq.
All.: Sakio Fleischer, Avannaata Kommuniani Siumut Gruppe sinnerlugu
Suleqatigiit maanna Avannaata Kommunia siuttuusut, Inuit Ataqatigiit, Atassut, Demokraatit, Naleraq, attaviittorlu 13. maj 2021 anguniagassatut isumaqatigiissuteqarlutik atsioqatigiipput kusanartumik tusarnersumillu aallaqqaasiuteqarlutik; ”Aqutsilluarneq – ineriartoqatigiinnerlu” Innuttaasugut misigipput aqutsilluartoqanngittoq ineriartoqatigiinngittugullu. Aqutsilluarneq borgmesterimit innuttaasunut ataasiakkaanut pitsaasoq ingerlatissuarput. Innuttaasut peqataatinneqartutut misigissapput, kommunimik piginneqataasutut ineriartortitseqataasutullu misigitinneqarlutik, tamannalu suliarissuarput, inoqarfinnut tamanut ornigunnikkut peqataatitsinikkullu”.
Suleqatigiillu atsioqatigiinnikut maanna takutippaat aqutsinermik tigummiaqarnertik ajornartorsiuteqarfigingaat.
Aningasaarsiorneq akileraaruutitigullu isaatitat ajunngitsumik ingerlangaluartut paarlattuanik aningaasartuutigineqartut aqunneqanngitsutut illutik ingerlanneqarput.
Aalisarneq ingerlalluarpoq, kipisaqattaanngitsumik aalisartut aalittapput, suliffissuillu uniffeqaratik ingerlaavarlutik aningasaarsiornikkut ajunngitsumik ingerlarsorpoq. Taamaattorli aqutsinerlunnerup nassataanik kommuni sipaarniarnermik imaannaanngitsumik nalaanneqarpoq, taamaattoqarnerani eqqorneqartussat arlaqarput. Innuttasunik kiffaartuussineq ingerlatsinnerlu kalluarneqassapput, sanaartugassat kinguartinneqarnerannut kinguneqassaaq, tamassumalu nassatarissuaa sanaartugassanut nutaaliorsinnaanerup ukiunut tulliuttunut aningaasalersuinissap innarlerneqarnera.
Malugineqassaarlu Kommunit aqunneqarnerannut inatsisartut inatsisaat nr. 29 17. novembarip 2017-imeersoq § 19 malillugu, Borgmesterip kommunip ulluinnarni allaffissornikkut aqunneqarnera isumagisussaava. Siumumiit arlaleriarluta inatsit toqqaammaviusoq innersuullugu kommunalbestyrelsemut oqariartuutigivarput, siullermik 17. juli 2023 ataatsimiinnermi inatsit innersuupparput. Aappassaanillu 4. september ataatsimiinnermi inatsit tunngavingalugu aqutsisoqarsimanngittoq uparuaatigingalutigu.
Ukioq manna kassekredit qaffannerani Avannaata Kommunia annertusisamik nakkutigineqartussanngortinneqarpoq Aningaasaqarnermut Naalakkersuisoqarfimmiit, tamanna imaannaanngitsuuvoq. Aqutsinnerullu ilorraap tungaanut saatinneqanngippat, allaffissornikkut aqunneqalersinnaaneq Siumumiit sakkortuumik ernumanartutut isingaarput.
Siumullu tungaaniit kommunip aqunneranerani akisussaasseqartumik ingerlatsineq patajaattoq anguniarlugu ilungersuuteqarnissaq qularineqassanngilaq