Anguniagaqallaqqissumik, iliuuseqallaqqissumik unneqqarissumillu Siumup allattoqarfia suleqatissarsiorpoq. Siumut suliffiuvoq naligiilluni sulinissamik pingaartitsisoq. Siumut suleqataaffigileruk Nunattalu siunissaa suleqatigisassatit peqatigalugit ilusilersueqataaffigalugu. Illit ilisimasatit uagut anguniakkatsinnut pingaaruteqarsinnaapput.
Siumut pillugu
Siumut partiiuvoq Nunatsinni innuttaasugut tamatta atugarissaarnissatsinnik namminersornissatsinnillu pingaartitsisoq. Sulisartut, savaatillit, piniartut aalisartullu partiitut qitiutittarpavut. Siumut oqaluttuarisaanermigut politikikkullu siuarsaarusuttuunermigut ilisarnaateqarluarluni Nunatsinni politikikkut inissisimanermut aalajangiisooqataalluinnarsimavoq aalajangiisooqataalluinnarlunilu.
Atorfiup imaa
Siumup allattoqarfiani politikikkut siunnersortitut suliassat ilagaat – siuttuvut, immikkoortortaqarfiit, Inatsisartunut ilaasortat suleqatillu peqatigalugit politikikkut siunnerfiit ilusilersorlugillu erseqqissarnissaat. Anguniakkat suliniutillu allat qanoq periuseqarluni anguneqarnissaat pillugit siunnersuissaatit paasiniaaqqissaarlutillu aamma politikikkut ineriartortitassat tunngavilersorlugillu oqaasertalersueqataaffigissavatit, tamarmik Siumup tunngaviusumik siunertaanut pingaartitaanullu naleqqussarlugit.
Inatsisartut ataatsimiinnissaanut piareersarnerit ataatsimiinnerannilu ataqatigiissaarinerit kingornalu nalunaarsuinerit suliassavit ilagissavaat aamma nittartakkatigut avammut ilisimatitsisarnerit tamakkununnga ilaapput.
Atorfimmi tassani iluatsissaguit politikimik soqutigisaqarluartariaqarputit, nunatta unammilligassaanut ilisimasaqarluartariaqarputit, oqaasilerillaqqissuusariaqarputit aamma paasiniaaqqissaarnissamut avammullu ilisimatitsisarnissamut piginnaaneqarluartariaqarputit.
Akissussaaffigisassat pingaarnerit
Politikimik ineriartortitsineq: Inuiaat Kalaallit kissaataat pisariaqartitaallu tunngavigalugit politikimik ineriartortitsineq.
Paasiniaaqqissaarneq: Pisunut, oqaluuserineqartunut politikikkullu ineriartornermut malinnaaneq, piffissaagallartillugulu paasiniaaqqissaarsimalluni innersuussuteqarneq.
Ilisimatitsisarneq: Oqalugiaatit piareersarnerat, tusagassiuutinut nalunaarusiorneq aamma ilaasortanut avammullu ilisimatitsinissat piareersarnerat.
Attaveqaatit: Siumup allanut suleqateqarnera attaveqarnerilu paarilluarlugit ineriartortissallugit, ilaallutik Naalakkersuisoqarfinni sulisut, innuttaasut, inuiaqatigiinni siuttut aamma soqutigisaqaqatigiiffiit.
Immikkoortortaqarfiit: Pisussanut, innuttaasunik ataatsimiisitsinernut suliniutinullu allanut ikiuunneq, pisunullu nalunaarsuineq kingornalu nalilersueqataaneq.
Piginnaasat
- Politikip sunaassusersinissaanut ilisimatusarsimaneq, soorlu politikikkut ilisimatusaatini bacheloritut qaffasinnerusumilluunniit naammassisaqarsimaneq aamma inuiaqatigiit sananeqaataanut, nunanut allanut tunngasunut, sillimaniarnermut illersornissamullu ilisimasaqarluarneq.
- Allat iliuuseqarnissaanut utaqqisuunnginneq, noqangasuuneq naammassisaqarsinnaassuseqarnerlu.
- Peqatigiiffilerinermik kattuffilerinermillu paasisimasaqarneq.
- Inuit attaveqaqatigiittarfiinut avammullu tusagassiinermut misilittagaqarneq.
- Kalaallit politikikkut ingerlaasiannut, kulturiannut inuiaqatigiinnullu ilisimasaqarluarneq.
- Paasiniaallaqqissuseqarneq, tunngavilersuisinnaassuseqarneq aamma ajornartorsiummik aaqqiinissamut piginnaaneqarluarneq.
- Oqaatsivut atorlugit allattariarsullaqqissuuneq erseqqissumillu oqaasinngortitsisinnaaneq. Ilanngullugit qallunaatut tuluttullu tamatigoortumik piginnaaneqarneq.
- Politikimut silassorissuseqarneq pisunullu soqutigisaqarluarneq.
- Suleqatit peqatigalugit namminersorluni sulisinnaassuseqarneq.
- Ulapaarnermi pisorpassuillu akornanni uippakajaartuunnginneq.
Akissaatit
Akissaatit isumaqatigiissuteqarnikkut inissinneqassapput. Atorfimmut atatillugu inissiaqartitsisoqarsinnaanngilaq.
Qinnuteqaat
Atorfimmut qinnuteqaat, ilinniakkanut misilittakkanullu uppernarsaatit ilanngullugit, uunga nassiunneqassaaq: siumut@siumut.gl.
Atorfik pillugu paasisaqarnerorusukkuit allattaaneq Ole Aggo Markussen paasisassarsiorfigineqarsinnaavoq: olagm@inatsisartut.gl.
Suliffigisassaq: Nuuk.
Suliffik: Piffissaq tamaat.
Qinnuteqarfissap killinga: 1. november 2023.
Aallartiffissaq: Decemberip aallaqqaataat isumaqatigiissuteqarnikkulluunniit.
Qinnuteqartut akornanni oqaloqatiginninneq pissaaq: Sap. ak. 45-mi.