Folketingip ammarneqarnerani Siumut tunuliaqutaralugu Folketingimi ilaasortatut sinniisoq Markus E. Olsen sisamanngormat oqalugiarpoq.
Folketingip oqaluttarfiani kalaallisut oqaluttoqarsinnaanera Folketingip Siulittaasoqarfiata pisinnaatitsineratigut Markus E. Olsen oqaatsit ilitsoqqussani atorlugit oqalugiarpoq.
”Oqaatsivummi sumiuunitsinnik kinaassutsitsinnillu ersersitseqataasut maani inimi kiisami akuerineqarsinnaalerput; taamaattoq uanni tamatsinullu pisariinnerpaasimassagaluarpoq toqqaannaq Folketingip nammineq aaqqissuussaanik nutserunneqarsimasuuguma”, Markus E. Olsen oqaluttarfimmit oqarpoq.
Oqalugiarnermini unamminartut assigiinngitsut Markus E. Olsenip tikkuartorpai. Kalaallit Nunaata naalagaaffinngornissaanik anguniagaqarnerata tapersersorneqarnissaa kiisalu Nunatsinni nalillit kalaallit namminneerlutik nammineq nalilersuiffigineqarnissaannik kissaateqarluni oqarpoq.
Danmark aallaaviginagu nunarsuarmioqatigut suleqatigineqalernissaat aamma kaammattuutigaa.
Kalaallit aamma danskit kulturikkut aamma kinaassutsikkut assigiinngitsuunerisa ataqqineqarnissaat kaammattuutsigaattaaq.
”Statsministeri, nunasiaasimanerup qarmarsua suleqatigiilluta uppisinniartigu!”, Markus E. Olsen ministeriunermut Mette Frederiksenimut oqariartuuteqarpoq.
Folketingimi ilaasortap Aki-Matilda Høegh-Damip Kalaallit Nunaata naalagaaffinngornissaanik sulissuteqarnera tapersersorlugu Markus E. Olsenip oqalugiarnermini naggasiilluni oqarpoq.
Aki-Matilda Høegh-Dam Folketingimi sulinngiffeqarallarnera arfininngorpat naammassissaaq, taamaammat Markus E. Olsen Folketingimi ilaasortaajunnaassalluni.
Oqalugiaataa uani atuarsinnaavat.