Meeqqat ulluinnarni pisariaqartinnerpaasaat angajoqqaarsianit pisarsimassagaat ilaatigut paasisaqarfigisimavakka. Kukkussutissaasunilli qinngusersortoqarlunilusooq qamasoqartarnera ajortussarsiortoqartarneralu isumaqarpunga nalilersoqqissaarneqartariaqavikkaluartoq.
All.: Laura Táunâjik Uitsatikitseq, Sermersuummi kommunalbestyrelsimut ilaasortaq, Siumut
Nunatsinni meerarpassuit illersugaanerat tusarsaaleraluaqisoq aappaatigulli tamanna ilaatigut apeqqusertariaqarsoraara. Kommuneqarfik Sermersooq ataani meeqqat ukiumut nalunaarutigineqartartut amerlasimassagunaqaat pingaartumik qaammat naanerisigut, akissarsiffikkulluunniit.
Taamaakkaluartoq meeqqat isumaalunnartutut nalunaarutigineqartartut ukiuni arlaqalersuni annerusumik suneqangaartarsimanngillat. Naak ilaatigut angerlarsimaffik ernumanartoqarfiusoq najugarigaluaraat annerusumik suliniuteqartoqarneranik malunnartoqangaarneq ajorpoq. Inoqarfinnilu ikinnerusunik inoqarfiusuni periusissaqartariaqarpoq ersarilluinnartumik nalunaarutiginnittoqarneranut tunngatillugu suliaqartut attuumassuteqannginnissaannik qulakkeerinnittumik.
Illua tungaanili angajoqqaarsiat paarsilluartut, meeqqanut asassuisut, sutigullu tamatigut tapersersuisut eqqunngitsumik pineqartarnerat ersarissiartulersutut ippoq. Tamanna assut quarsaarnarpoq, meeqqammi angerlarsimaffiat (børnehjemmit) sumiiffinni amerlanerpaani ulikkaaqqapput, sulisoqarnikkullu aalaakkaanerpaanissaat qularutigaara. Taarseraattummi amerlasarmata, tamannalu sumiiffinni assigiinngitsuni ajoraluartumik nalinginnaaleraluttuinnalersimavoq. Naak suliffissaaleqineq piugaluartoq akerlianik ilaatigut sulisussarsiorneq aamma ajornakusoortarsimasoq paasivara.
Kukkussutissanik qamasut
Børnehjemmit angajoqqaarsianiit meeqqanut isumaginninnerat asassuinerallu aammalu kissalaarnermik tunisinerunissaat qularilluinnarpara. Meeqqat ulluinnarni pisariaqartinnerpaasaat angajoqqaarsianit pisarsimassagaat ilaatigut paasisaqarfigisimavakka. Kukkussutissaasunilli qinngusersortoqarlunilusooq qamasoqartarnera ajortussarsiortoqartarneralu isumaqarpunga nalilersoqqissaarneqartariaqavikkaluartoq.
Angajoqqaarsiaasut ilaanni assersuutissamik tunngavilersuissaanga: Angajoqqaarsiat meeqqanut qatanngutigiinnut asannittut, allaat nukarliusuniit anaana ataataartorneqartut. Qanilaarnermik pakkutaarneqarnermillu tunineqartut ulluinnarni inuuneranni isumagineqangaaqisut atorsimavaat.
Angajoqqaarsialli inuusuttuaranngulersumik erneqarput, taanna peqaaminik aneertilluni qaninngoorsimavoq. Tamanna pisoq pillugu niviarsiaq politiinut nalunaarutiginnippoq. Suliap aallartinneqarnera nukappiamut tassunga taamaallaat attuumassuteqarpoq, minnerpaamilluunniit meeqqanut paarineqartunut tunngassuteqanngilluinnartoq.
Kommuni eqqartuussivinngorpoq
Pisoq eqqartuussivimmiit aalajangerneqanngitsoq, suliarlu suli ingerlasoq angajoqqaarsialerisut eqqartuussisutut inissinnerat, inissaminiinngilluinnarpoq. Tamassumalu kinguneraa angajoqqaarsiat meerarsiaminniit ullormiit ullormut arsaagaapput. Naak meeqqanut taakkununnga attuumassuteqanngilluinnaraluartoq pisoq. Meeqqat ikiligaarujussuarput, pinngitsaalisaasunik angerlarsimaffik toqqissisimaffigisaminninngaanniit peersitaapput, allaallumi anaanarsiaasoq meeqqanut pulaaqqusaajunnaarnermik kinguneqartinneqarpoq.
Meeqqat isumagineqarnerat innarligaavoq, toqqissisimanerat aserugaapput. Naak sullissisut? Naak inatsisit? Naak eqqortoq? Naak inatsisitigut tunngavissaq? Kommuneqarfik Sermersuumi ilaqutariinnik paarsisartunik peqalernissarput siunertaavoq, akerlerluinnaanili iliuuseqartoqarnera siunertamut ungasingaarmat ernumanartutut isummerfigisariaqarpoq.
Ikilersukkat naammaleraluarput
Taamaattumik nunatsinni systemilunnerujussuaq aatsaat taamak pingaaruteqartigileraluarpoq aaqqissuuteqqissallugu, periuseq iliuuserlu ajorluinnarput, meeqqat illersorneqanngillat. Tamanna oqaaseq mianerisassaammat illersuineq piviusoq atorneqartariaqarpoq. Meeqqat ikilersukkat naammaleraluaqimmata.