Ulluni 16. aamma 17. september Siumup Inuusuttunut Suleqatigiiffia Aasianni ileqquusumik ataatsimeersuarpoq. Inuusuttut pingaartitaat oqaluuserineqarput pitsanngoriaatissanillu suliassarpassuaqartoq siulittaasunngortoq isumaqarpoq.
Ataatsimeersuarneq eqeersimaartumik, uummaarissumik ileqqorissaartumillu ingerlanneqartoq naammassilluarneqarpoq.
Ataatsimeersuarnermi sorpassuit anguniagassanngortinneqarput, taakkunannga pingaarnertut qulequttat pingasut iliuuseqarfigineqartussatut inissinneqarput, tassaasut ilinniartuunerup nalaani suliffissaqarnissap pingaaruteqassusaa, inuusuttunut inissiat naammattut naleqquttullu pigineqarnissaat aamma sulisinnaanngornissamut inuusuttunut killilersuutit nalilersoqqinneqarnissaat.
Ataatsimeersuarneq naggaserlugu siulersuisuunernut qinersisoqarpoq. Taasisinnaallutik najuuttut 18-it aalajangerpaat, ukiuni tulliuttuni marlunni SIS ukunannga siulersorneqassasoq:
Siulittaasoq: Paarnannguaq Jonathansen.
Siulittaasup tullia: Nukarleq Jonas Jensen.
Siulittaasup tulliata aappaa: Malik Knudsen.
Siulersuisunut ilaasortat: Amalie Bourup, Else Louise Andersen Nathansen, Edvard Olsvig Sandgreen aamma Avataq Motzfeldt.
Sinniisussat: Ilatsiaq Markussen, Ivalu Jensen, Nuka S. Ugpernángitsok’ aamma Laila Kruse.
