Karl Tobiassen ullumimiit atuutilersumik Aalisarnermut Piniarnermullu Naalakkersuisutut tunuarniuteqarpoq. Naalakkersuisut Siulittaasuannut ammasumik allagai ima imaqarput:
Asasara Naalakkersuisut Siulittaasuat,
Matumuuna ataqqinnillunga Aalisarnermut Piniarnermullu Naalakkersuisutut atuuffinnit tunuarniuteqarnera qinnutigaara.
Siorna akisussaaffik pingaarutilerujussuaq tigusussanngorakku nutaamik aalisarnermut inatsimmik pilersitsinissaq neriorsuutigisimavara. Inuttut ajuusaarutigisannik suliaq ukiaq manna Inatsisartunut oqaluuserisassanngortinnissaa angumerineqarsinnaasimanngilaq, taamaattumillu Naalakkersuisutut neriorsuutiga eqquutsissinnaasimanngilara. Tassunga atatillugu politikikkut akisussaaffik tamarmiusoq uanniittoq tiguara.
Inatsisartunut uteqqinnissara suleqatillu nutaamik suleqatigeqqilernissaat qilanaaraara. Nunatsinnut inuinullu aalajangigassani pingaarutilerujussuarni nunatta siunissaanut kalluaaqataasussani pisarnera naapertorlugu suleqataanissara naatsorsuutigineqassaaq.
Maanna Naalakkersuisutut atuuffik qimakkaluariga qularutigineqassanngilaq nunarput, inui, nunatsinnilu aalisarnikkut inuussutissarsiorneq sapinngisara tamaat illersortuassagakkit. Aqqutini unammilligassaasinnaasartut nunatta aqqusaagassai ilisimalluinnarpakka, ataatsimooruttalu ajunnginnerpaamik angusaqarnissarput upperaara.
Ataqqinnittumik,
Karl Tobiassen
Siumut