Siumup Qasigiannguani ataatsimeersuarnera naggaserlugu, siulersuisuunernut qinersisoqarpoq. Taasisinnaallutik najuuttut 68-it aalajangerpaat, ukiuni tulliuttuni pingasuni Siumut ukunannga siulersorneqassasoq.
Erik Jensen siulittaasutut ingerlaqqippoq, taasinermi siullermi affai sinnerlugit amerlanerusunik taaguunneqarnermigut 39-nit qinerneqarluni.
Siulittaasussatut sassaqataasut ima taaguunneqarput: Aki-Matilda Høegh-Dam 16-inik taaneqarpoq Kim Kielsenilu 13-inik
Siulittaasup tulliatut ingerlaqqippoq Vivian Motzfeldt, unammillerteqarani ersaartaannikkut ingerlaqqittoq, ersaartaannikkuttaaq Inunnguaq Reimer Vivianimut sinniissussanngorpoq.
Siulittaasup tulliata aappaattut Hans Peter Poulsen aamma Evelyn Mølgaard sassarput, Hans Peter Poulsenilu 39-nik qinerneqarluni tassunga inissippoq, Evelyn Mølgaardilu 28-nik qinerneqartoq sinniissussanngorluni.
Siulersuisuunernut ilaasortassanik pingasunik, taakkulu sinniissussaanik marlunnik qinersinermi, uku ilaasortanngorput:
Bernhardt Olsen, 43-nik qinerneqarluni, Ole I. Frederiksen 36-nik qinerneqarluni aamma Doris J. Jensen 29-nik qinerneqarluni (kingulleq makitsinikkut).
Sinniissussatut inissipput Peter Davidsen aamma Evelyn Mølgaard tamarmik aamma 29-nik qinerneqartut.
Siulersuisuunernut ilaasortanngorputtaaq Ataatsimut Siulersuisoqarfiit (kommunikkaartumik suleqatigiiffiit) ataatsimeersuarnerisa kingorna siulittaasunngortut ukuussut:
Karla Egede Bisgaard (Kommune Kujalleq, sinnisssussaralugu Karlina Lundblad), Dorthe-Marie Mogensen-Fontain (Kommuneqarfik Sermersooq, sinniissussaralugu Thiooq Knudsen), Rene Lennert Frederiksen (Qeqqata Kommunia, sinniissussaralugu Marie O. Egede), Frantz Lundblad (Kommune Qeqertalik, sinniissussaralugu Per Ole Frederiksen) aamma Sakio Fleischer (Avannaata Kommunia, sinniissussaralugu Paarnannguaq Mathiassen).
Siumup Inuusuttunut suleqatigiiffiannit siulersuisuunernut ilaasortanngorput Amalie Bourup aamma Paarnannguaq Jonathansen.