Qasigiannguani Siumup ataatsimeersuarnerani Siumut Qasigiannguit arfininngornermi unnukkut timersortarfimmi unnussiuaaqatigiissitsipput. Ataqqinaammik ilaasortanngortitsineq ilanngullugu takkussimasorpassuit ilagalugit ingerlanneqarpoq. Ataqqinartumut Ruthimut siulittaasoq ima oqaaseqarpoq.
Asasara Ruth
Siumup nuna tamakkerlugu ataatsimeersuarneranut atatillugu, siulersuisuunerit aalajangersimapput inunnik marlunnik ataqqinaammik ilaasortanngortitsiniarlutik. Tassa arnamik angummillu toqqaavugut.
Ataqqinaammik ilaasortanngortitsinermut atatillugu suliarpassuavit ilamininngui kiisalu kinaanerit tamanut oqaluttuarilaarusuppara.
Ruth Heilmann – arnaq ataqqinartoq, nukittooq, arnaq imaanaanngitsoq – apriilip tallimaanni 1945-mi Arsunni inunngorpoq. Ilinniartitsisutut ilinniagaqartoq 1989-milu Maniitsumi kommunalbestyrelsimut – Siumut sinnerlugu – qinikkatut sulileqqaarpoq. 1997-miit 2001-ip tungaanut Maniitsumi borgmesteriulluni.
Ruthip uia nappaassuarmik kræftimik eqqugaanermini kingunerisaanik 1997-imi akornatsinniikkunnaarpoq. Ruth-i tallimanik qitornaqarpoq, ataaserli akornatsinniikkunnaarnikuulluni. Ruthilu arfineq pingasunik ernutaqarluni.
1995-mi Inatsisartut qinigaavoq, marloriarlunilu Naalakkersuisutut sulisimalluni; siullermik 2002-mi Ilinniartitaanermut Naalakkersuisutut aappaatullu 2003-miit Ilaqutariinnermut Peqqinnissamullu Naalakkersuisutut.
Ruth Heilmann tassaavoq arnani siullersaalluni Inatsisartut Siulittaasuat ukiuni 2008-miit 2009-p tungaanut.
Ruthip politikikkut sulinermini pingaartittuartarpaa nuna tamakkerlugu sulinissaq, kisiannili aamma ilisarnaatigilluarlugu aggerfini pillugu pitsanngorsaataasinnaasunik ilungersuuteqarnissaq, tassalu Maniitsoq. Imatut paasineqassanngilaq Nuna tamakkerlugu sulinngitsoq, kisianni aggerfik puiornagu aamma sulissuteqartarnissaq.
Ruth Heilmannip politikikkut sulinera malunnaatilimmik inerititaqarfiusimasut ilagaat Isumaginninneq pillugu Ataatsimiititaliarsuarmi siulittaasutut sulisimanerani. Ataatsimiititaliarsuaq 1995-mi pilersinneqarpoq, taamani Siumut aamma Atassut Naalakkersuisooqatigiipput. Ataatsimiititaliarsuup suliai ulloq manna tikillugu suli inuiaqatigiinnut sunniuteqarput.
Inuiaqatigiit inatsisit tunngavigalugit ingerlanneqassasut Ruth Heilmannip pingaartitaasa ilagaat.
Ruthip aalajaatsumik isummertartuuvoq, pingaartitaralugulu inatsisitigut eqqortumik toqqammaveqarluni sulinissaq.
Siulersuisuunerit isumaqatigiittut aaliangerpaat Ruth Heilmann, Siumut nuna tamakkerlugu Qasigiannguani 2023-imi ataatsimeersuarnerani ataqqinaammik ilaasortanngortinneqarnissaa pissasoq.
Taamaattumik ataqqinartoq Ruth Heilmann, Siumumi Siulersuisuunerit sinnerlugit ataqqinaammik ilaasortanngortinneqarninnut uppernarsaat matumuuna tunniuppara, neriullunga tigulluassagit.
Pilluarit.