Kaaleeraq Heilmann ajoraluartumik sivikitsuinnarmik napparsimareerluni akornatsinniikkunnaarpoq.
Kaaleeraq sinerissap qanittuani raajarniarnerup aallarnisarneqarneraniit qanimut peqataaqqissaarluni namminerisamik aalisariutaateqarnikkut ingerlatsisimavoq. Tamatuma malitsigisaanik nunatsinni aalisartut kattuffiat aqqutigalugu isumaqatiginninniaqataasartutut akinik pitsaasunik atugaqartitaanissamut sorsuuteqarluartuunini ilisarnaatigisimavaa. Ilaatigullu Qeqertarsuup tunuani raajarniat peqatigiiffianni ukiorpaalunni aamma siulittaasuusimalluni.
Illoqarfik Qasigiannguit asalersimasani “saarnguigissallugulu” aalajangiusimasani pillugu suliffissuaqarnikkut ingerlaannarnissaa mikinngitsumik sorsoqataaffigaa.
“Avataani” inissilluni nilliasuuinnarneq naammaginagu Qasigiannguit Kommuniani Borgmesteritut aamma atuuffeqarpoq qinigaaffik ataaseq.
Sinerissap qanittuani raajarniarnerup aaqqissuuteqqinneqarnerata kingunerisaanik angallatini Sisak pigiinnarlugu allatut inuussutissarsiuteqarneq ingerlateqqippaa. Tassalu Qasigiannguani suliffissuup nutaaliaasup suliassaqartitaaneranut atasumik aalisakkanik assartuutitut nalimmassarlugu assartuinermik ingerlatsilluni utoqqalinini pissutigalugu uninnissami tungaanut.
Ukioqqortusilluni namminersorluni inuussutissarsiutiminik unitsitsinermi kingorna illoqarfimmi asalersimasamini peqatigiiffeqarnikkut pingaartumik utoqqarnut tunngatillugu suleqataaneq oqalliseqataanerlu annertuumik ingerlatilerpaa. Aammali pisortaniit siunnersuisooqatigiit siulersuisoqarnerilluunniit pisussaaffimmisut isigalugit peqataaffigiuarsimavai.
Kaaleeraq inuk piumassuseqqortooq aasaanerani angerlarsimarpiassanani angalajuartartoq nuliaminut kinguaaminullu asannittoq pingaartitsisorlu takuneqarsinnaajuaannartuuvoq.
Taamaammat angalajuartuunermini ataasiarani tusagassiuutitigut apersorneqartarnermini oqaatigiuartarpaa Nuliani illumi ningiuusoq qanoq ilaqutariit ataatsimoornerannut imminermullu qanoq pingaaruteqartiginera qutsavissaqarfigeqalugulu.
Kaaleeraq Heilmann Qasigiannguit Kommuniani Nersornaammik tunineqarnikuuvoq.
Nunattalu qitornaasa ilaattut taaneqarsinnaanini pissutigalugu pissusissamisoortumik Inatsisartut nersornaasiuttagaannik 2022-mi nersornaaserneqarpoq.
Kaaleeqqap eqqaaneqarnera ataqqinartuuli.
Erik Jensen
Siulittaasoq