Kommunalbestyrelsip pissutsit eqqortumik ingerlanneqarnissaat aalajangikkallu ilumut atorsinnaanerat suliassaraa qulakkiissallugu. Kingullermik immikkut ittumik ataatsimiinnitsinni uagut qinikkat kommunip ingerlanneqarneranut sunniuteqarsinnaanngitsutut inissippugut. Tamanna soorunami akueriinnarsinnaanngilarput, qanimullu oqartussaaqataanissaq inatsisillu naapertorlugit ingerlatsisoqarnissaa Siumumi nangillugu sorsuutigiinnassallutigu
All.: Inga Dóra G. Markussen, Kommuneqarfik Sermersuumi Siumup gruppia sinnerlugu
Tallimanngornermi februaarip 18-iani 2022-mi kommunalbestyrelsimi ataatsimiinneq kingulleq immikkuullarissutut oqaluttuarisaanermi inissinneqassaaq. Ataatsimiinnermi amerlanerussuteqartut Inuit Ataqatigiit, Naleraq Demokraatillu aalajangerput namminneq allaffissornikkut ingerlatsinerminnik isornartorsiuinissamut periarfissaqarumanatik. Maannamut ineqarnermut suliaq pillugu kommunip ingerlatsisimanera pillugu eqqartuussissuserisunik misissuititsinerpassuarnit saqqummiussineq ataaseq eqqartuussissuserisut suliffeqarfianit akilerneqartuni uissuumminarnersaasoq tassaavoq Kommunit Nakkutilliisoqarfiat kommunimik isornartorsiuisinnaanngitsoq.
Saqqummiussineq peqqutigalugu kommunalbestyrelsimi amerlanerussuteqartut ima inerniliipput taamaallaat Naalakkersuisut allaffissornermik pillaasinnaasut, tassalu borgmesteriusumik. Tamannalu tunngavilersuutigalugu amerlanerussuteqartut ineqarnermut suliaq ilungersunartoq pillugu kommunalbestyrelsimi allaffissornermi iliuuserisat oqaluuserineqarnissaat itigartitsissutigaat, taamaalillutillu innuttaasut sullinneqarneranni namminneq sunniuteqarsinnaanertik piumanagu.
Kommunit aqunneqarnerat pillugu inatsimmi ersarikkaluarpoq kommunalbestyrelsi aqutsinermi qanoq akisussaatinneqarsinnaanersoq. Qanorlu taamaaliortoqarsinnaanersoq aamma inatsimmi tassani aalajangersarneqarpoq. Kommunalbestyrelsilli tamakku tamaasa killormut paasivaat allaallu ima inerniliillutik Naalakkersuisut ataani inissisimallutik.
Amerlanerussuteqartummi paasitinneqarsimapput taamaallaat Naalakkersuisut kommunimi qinigaasunik uagutsinnik isornartorsiuisinnaasut, Kommunillu Nakkutilliisoqarfia isornartorsiuinissaminut pisinnaatitaanani. Taamatut inerniliinermi ajornartorsiutaavoq taamatut aalajangiinissamut tunngavigineqartussat pisinnaanngimmata, taamaalillutalu maannamut inatsisit malillugit ingerlatsisimanerput taamaatinneqarluni.
Maleruagassat taamaapput
Kommunit aqunneqarnerat pillugu § 23-mi ilitsersuutigineqarpoq tunngavissat suut naammassineqartariaqarnersut borgmesterip uppitinneqarsinnaanissaanut. Borgmesterip kommunalbestyrelsimit suliakkerneqarnini suliariumanngippagu kommunalbestyrelsip borgmesterip tullia ivertissinnaavaa suliassarlu suliaralugu. Borgmesterip arlaleriarluni allaallu suliassanik suliarinninnissaq itigartippagu, kommunalbestyrelsip borgmesteri tunuartissinnaavaa. Tamatumunnga peqqutaavoq borgmesteri ajunngitsorsisarmat, tassalu kommunalbestyrelse aqqutigalugu innuttaasunit ivertinneqarluni.
Tunuartitsisoqarpat kommunalbestyrelsip aalajangiineq erngerluni Kommunit Nakkutilliisoqarfianut nalunaarutigissavaa. Matumani Naalakkersuisut akuliutissapput. Februaarilli 18-iani kommunalbestyrelsimi amerlanerussuteqartut tassunga inissipput, taamaalillutik avaqqutaaralutik suliap oqaluuserineqarnissaa pinngitsoortillugu. Amerlanerussuteqartut ilaatigut oqaatsit soorlu kukkusumik paasinninneq atorpaat peqquserlunniarnermik pissaanermillu atornerluinermik suliap ilungersunartup kommunitsinni oqaluuserineqarnissaa pinngitsoortinniarlugu, taamaalillunilu aamma immaqa inernilerneqarluni naammassineqarlunilu.
Soorunami allaaserineqartutuut allaffissornermut pillaaniarnertut inissisimaneq pilersinnaanngilaq kommunalbestyrelsip suliaq pineqartoq oqaluuserisimanngippagu pisariaqartumillu aalajangiilluni, taamaalilluni suliaq Kommunit Nakkutilliisoqarfianut akuerisassatut saqqummiunneqarsinnaalluni.
Kommunimi inatsisitigut inissisimaneq amerlanerussuteqartut paasinninnerattuut iinnassappat taava kommunalbestyrelse suliassaminik sulisinnaaneranik mattutissavarput. Qanormi taava ililluta allaffissornerup equsoorluinnarnera pillarsinnaassagatsigu?
Soorunami tamanna nipangiinnarluta akueriinnarsinnaanngilarput. Inuit Ataqatigiit sinnerlugit borgmesterip tamanna kommunalbestyrelsimi sulinermik aserorterinertut nalilerpaa. Assaa suliamik akileraartartunut akisoqisumik matooriniartoqarpoq. Suliaq manna tassunga killeqanngilaq. Ineqarnermut suliami akisussaatitsiniarnerput ingerlatiinnassavarput – soorunami.