Demokratiimut asissuisut iluatsitsissanngillat

Unnuaq Vladimir Putinip nuna inuilu demokratiimik tunngaveqarlutik ingerlatsisut sakkutuulersuilluni saassuppai. Pisoq Inuiaat Kalaallit akuersaanngilluinnaraat tamatta ataqatigiilluinnarluta erseqqissuliuutsigalugu suaarutigissagipput pingaaruteqarpoq

All.: Vivian Motzfeldt, siulittaasup tullia, Siumut

Ullaaq iterpugut Vladimir Putin Ukrainemut saassussisimasoq. Tamanna sivisuumik nunat killiit NATO-llu ilimasaarutigisimavaat, pisorlu ulloq manna aallarnerfigalugu ulluinnarsiutigilertussaassavarput.

Nunarput nunanut killernut ilaavoq, demokratiimik aamma inatsisinik tunngaveqarluni ingerlatsiviusoq, tamannalu illersugassaraarput. Erseqqissumillu naalakkersuinikkut avammut oqariartuutigineqartussaq unaassaaq, nunamut inuinullu demokratiimik ingerlatsiviusumut, kisermaassilluni ingerlatsisup saassussinera, Inuiaat Kalaallit akuersaanngilluinnaraat.

Ataqatigeeqqissaarnitsinnut ilanngullugu ilisimasassarput tassaavoq, nunarput Danmarki aqqutigalugu NATO-mut ilaasortaammat, tamannalu ulluni makkunani ataatsimoorfigalugu ingerlatissavarput. Nunat Killiit ataatsimut illersortussaallutik neriorsoqatigiissimanerat uatsinnut aamma atuuppoq, taamaattumillu uaguttaaq pisariaqarfiatigut peqataaffigissavarput, taamaalilluta inooriaasitsinnut, pingaartitatsinnut naleqartitatsinnullu illersuineq pisinnaanerput tamaat tapersersorlugu.

Tamanna isumaqaratarsinnaavoq, iligiit NATO-mut ilaasortat, nunatsinnik atuinerulernissamik kissaateqarnerannik kinguneqaratarsinnaasoq. Tamannali aatsaat piviusunngorsinnaasoq nunatta tamakkiisumik peqataatinneqarneratigut. Inooriaasitta, pingaartitatta naleqartitattalu  illersornissaanut akisussaaqataavugut pisussaaffeqarlutalu. Akisussaaqataanerpullu akueralugu Inuiaat Kalaallit ajunnginnerpaamik angusaqarnissaat sulissutigissallugu.

Taamatuttaaq Naalakkersuisut naatsorsuuteqarfigaavut, maani inuunitta akornusersorneqannginnerpaaffissaminiitsinnissaa sulissutigalugu sinnerluta sulinertik ingerlatissagaat.