ESU annertuumik mangiarneqarpoq

Aalisarnermik piniarnermillu inuussutissarsiortut ukiuni tulliuttuni annertuumik nutarterinissaminnut annikillisaavigineqartussanngorput. Uggornarpoq aalisarnerup iluani siuarsaanissamut periarfissatuaasut ilaat pingajorarterummik piiaavigineqalermat. Naalakkersuisooqatigiillu pineqartumut tunngatillugu politikiminnik nassuiaasariaqarput

All.: Lars Poulsen, Inatsisartunut ilaasortaq, Siumut

Ukioq manna aallartiffigalugu aalisartut piniartullu inuussutissarsiornermikkut siuarsaaniartut pisortaniit aningaasaliiffigineqarsinnaanerat annertuumik mangiarneqassaaq. Aningaasaliissutit siusinnerusukkut 8,1 mio. kroniusimasut, ukioq manna aallartittumik 2,8 mio. kroninut apparneqassapput.

Aningaasaliissuteqarnissamut ESU aqqutigalugu periarfissiissutigineqartartut angallatitaarnermi 75 procentimiit 84 procentimut matussutaasaraluarput. Tamannalu Naalakkersuisooqatigiinnit periarfissiissutigineerukkiartussasoq aalajangerneqarsimavoq.

Uggoraara taamak annertutigisunik appartinneqarmat, pingaartumik aalisarneq nunatta aningaasarsiorneranut pingaaruteqarluinnartutut inissisimatillugu.

Inuussutissarsiutitta pingaarnersaat, aalisarneq, taamaalilluni isorliunerusuni ineriartortinneqarnera naalakkersuinikkut annikillisinneqarpoq. Isumaqarpungalu taamak mangiaanikkut umiatsiaararsortut akornanni inuussutissarsiorneq annikillisaavigalugu aallartinneqartoq, naak nalunngikkaluaripput ilaqutariippassuit inuussutissarsiummik taassuminnga nappateqartut aningaasarsiuteqartullu.

Eqqarsaatigigaannilu tunitsiveqarniarnikkut sumiiffiit ilaanni qanoq ilungersunartigisumik aningaasarsiorniarnikkut ingerlatsisoqartoq, ilaatigut tunitsiveqarneq avataasiortut sorpassuartigullu aningaasarsiorluartut aquttarmassuk, ernumagaara umiatsiaararsortut taamak siunnerfeqarnikkut ipitikkiartorneqartussatut takorloorneqarsimassasut. Naalakkersuisooqatigiimmi allatut aaqqiissuteqarnissamut maannamut oqariartuuteqarsimanngillat.

Aallarnisaaniartunut nutarsaaniartunullu aalisariutinillu naleqqussaanissamut aningaasaliissutit taamaalilluni uggornaraluaqisumik  periarfissaajunnaarsikkiartorneqarnerat assut uggornarpoq ernumaannarnermillu misiginarluni.

Taamaattumik periarfissanik mangiaaneq sunik pissuteqarnersoq Naalakkersuisooqatigiit inuiaqatigiinnut nassuiartariaqaraat isumaqarpunga, pineqartumut qanoq politikeqarnertik ilanngullugu.