Ulluni makkunani Kujallermi savaatillit imaanaanngitsumik nalaataqarput, annertuumik apinerata kingunerisaanik savaatit qaqqani appussaaqqasut annaanniarlugit tamaviaalersimammata.
Pisoq nunalerisunut imaanaanngilaq, savaatillillu ilisimatitsisalereerput namminneq paasinninnertik naliliinertillu naapertorlugu, pisoq ajunaarnersuartut paasineqartariaqartoq.
Ukiuni kingullerni assingusunik nalaataqartarpugut, soorlu silap pissusaata allanngoriartorneranik pissuteqartumik imaani inuussutissarsiortut ukiorluarnerani eqqornerlunneqartarnerat eqqarsaatigalugu aamma siorna Kulusummi uuliaarluernerup kingunerisaanik piniartut eqqornerlunneqarnerat ilanngullugu. Pisuni taakkunani pinerit tamaasa Naalakkersuisut saanneqartarput, uanilu aamma taamak inississinnaaneq naatsorsuutigineqartariaqartoq Siumut isumaqarpoq.
Taamaattumik Naalakkersuisut utaqqigatik iliuuseqarlutik aallartinnissaat pisariaqarpoq.
– Piffissaagallartillugu Naalakkersuisut piareersaateqarlutik aallartissasut Siumumit piumasaraarput. Ajunaarnersuaqarnermut aningaasat atorneqartussat pisariaqassappat atorneqarnissaat siunertaralugu Naalakkersuisut piareersarlutik aallartereertariaqarput, tassami siusinnerusukkut iliuuseqarsinnaajunnaarluni inissittarneq akuersaarneqarsinnaanngitsoq Siumut isumaqarpoq, nunalerinermut oqaaseqartartoq, Mala Høy Kúko oqarpoq.