Folketingimi ataatsimiinnerni danskisuinnaq malinnaasinnaaneq unitsinneqartariaqarpoq. Siumut tunuliaqutaralugu Folketingimi ilaasortaq Aki-Matilda Høegh-Dam isumaqarpoq. Tassami Folketingimi ataatsimiittoqaraangat Nunatsinni innuttaasut malinnaaniarnerat killeqartarpoq, ataatsimiinnerit danskisuinnaq pisarmata.
Ataatsimiittoqartillugu danskisuumit kalaallisuumut nutserisoqartarnissaa pingaaruteqartoq Siumut Folketingimit isumaqarfigineqarpoq, Folketingimiimmi aalajangerneqartartorpassuit Kalaallit Nunaannut attuumassuteqartarput.
Toqqaannartumik nutserisinnaasoqartalernissaa pisariaqarmat Siumut Folketingimi sulissuteqarnikuuvoq. Folketingimilu ataatsimiinnermi kalaallisut nutserneqartalernissaat suliniutaavoq oqaluttuarisaanermut pingaarutilik.
Kalaallisut oqaatsigut Folketingimi sunniuteqarnerulissapput, tamannalu pingaaruteqarluartuusoq Aki-Matilda Høegh-Dam isumaqarpoq.
Interprefy suleqatigineratigut kalaallisut Savalimmiormiusullu nutserisoqartalersinnaanera pingaaruteqartoq Siumut Folketingimi isumaqarpoq. Taamatut aaqqissuussisoqarneratigut Folketingimi sulinerup Kalaallit Nunaannut erseqqinnerulernissaa anguniagaavoq.
Taamatut aaqqissuussisoqarnissaa Siumut Folketingimit sulissutigineqarpoq. Folketingimi Siulittaasoqarfiup nutserisoqarnissaa sulissutigisussaagaluarpaat. Taamaattoq Folketingimi nutserisoqarnissaa Siumumit pingaartinneqarmat siuttuuffigineqarluni aaqqissuunneqarpoq. Taamatut aaqqissuisoqarneratigut takutinneqassaaq Kunngeqarfimmi nunani pingasuni oqaatsit naligiimmik inissisimasuusut.
Folketingip Siulittaasoqarfiata aaqqissuussineq piviusunngortinneqarnissaa aalajangiiffigineqassaaq, tamanna Siumumit neriuutigineqarlunilu upperineqarpoq. Folketingimi toqqaannartumik nutserineq misiliutaasoq siulleq aqagu marlunngornermi pissaaq. Tamanna danskit nalunaaqutaat malillugu 13.00-imit 13.20-ip tungaanut pissaaq.
Misiliineq una toorlugu malinnaaffigineqarsinnaavoq:Â https://interprefy.interpret.world/page