Aalisarnermut naalakkersuisuusarsimasut ukiut 20-t kingumut, Aalisarnermut Naalakkersuisup sianerfigineqaannarlutik aalisarnissamut akuersissutinik tunniussuisarsimanerarlugit Ilulissani pasinarsaarutaa, maanna Aalisarnermut Ataatsimiititaliap siulittaasuanit salluliuutinngortinneqarpoq
All.: Karl Tobiassen, Inatsisartunut aamma Aalisarnermut Ataatsimiititaliami ilaasortaq
Ilulissani aalisarneq pillugu tusarniaanermi Aalisarnermut Naalakkersuisoq, aalisarnermut naalakkersuisuusarsimasunut sakkortuumik pissusissamisuunngitsumillu pasinarsaarivoq, oqarluni taakku sianerfigineqaannarlutik akuersissutinik tunioraasarsimasut. Pisoq taanna maanna naalakkersuisooqatigiinnit imaanaanngitsumik salluliorninngortinneqarpoq.
Siumup pisoq eqqunngitsutut isigalugu naalakkersuisuusarsimasunillu mingutseriniarnertut isigalugu, § 37 aqqutigalugu apeqquteqarfigisimavaa. Naalakkersuisoq akivoq kikkut pineqarnersut ilisimannginnamigit oqaatigisinnaanagu.
Ippassaq Qanorooq aqqutigalugu Aalisarnermut Ataatsimiititaliami siulittaasoq, Jens Napãtôq oqariartorpoq, Aalisarnermut Ataatsimiititaliamigooq sammineqarluni apeqqutit akinereersut, Siumumilu ilaasortat ilisimalereersimassagaat.
Ajoraluartumik takornartaajunnaarpoq, naalakkersuinikkut nunatta ingerlatitaanera sallumik akooriartorneqariartuinnalernera. Tamanna pissuteqarsimassaaq, sallu atorlugu aallaqqaammut oqariartorniarsimagaanni – siusissukkullu erseqqissumik sallusimanermik nassueruteqarsimanngikkaanni – sallu sumorsuaq ingerlallugu nassuiaassutigineqalertussaammat. Tamanna ippassaq Qanorooq aqqutigalugu takuarput.
Naleraq sinnerlugu Aalisarnermut Ataatsimiititaliami siulittaasoq, Jens Napãtôq oqarpoq, Siumumit apeqqutigineqartut Ataatsimiititaliami akineqareersimasut. Siumup erseqqissaassutigissavaa, tamanna eqqunngilluinnarmat salluliornerummallu. Qaquguluunniit sallu atorlugu nunarput naalakkersuinikkut aqunneqalissanngilaq.