Aalisarnermut naalakkersuisuusarsimasunut utoqqatsertoqarniarnersoq pillugu apeqquteqaat

Jess Svane, Inatsisartunut ilaasortaq, Siumut

Inatsisartut suleriaasianni  §  37 imm. 1 naapertorlugu Naalakkersuisunut apeqqut imaattoq matumuuna saqqummiuppara:

Naalakkersuisunut apeqqut:

  1. Naalakkersuisut, Aalisarnermut naalakkersuisup aalisarnermut naalakkersuisuusarsimasut pillugit pasinarsaalluni oqaaseqarsimaneranut, ukiuni kingullerni aalisarnermut naalakkersuisuusarsimasunut utoqqatsissuteqarniarpat?

Tunngavilersuut:

Naalakkersuisunut apeqquteqarpunga[1] naalakkersuisuusimasut kikkut pineqarnersut uppernarsarneqarsinnaanersoq, aammalu taama tunniussisarnerit qanga pisarsimanersut. Aalisartullu qassit sianiinnarlutik aalisarsinnaanermut akuersissummik tunineqarnikuusimanersut.

Naalakkersuisut apeqquteqaammut akissuteqarput, akuersissummik piniartut naalakkersuisunut toqqaannartumik saaffiginnillutik pissarsiniartarsimasut. Apeqqutigisakkali akineqanngillat, tassami aalisarnermut piniarnermullu naalakkersuisoq kikkut tamarmik tusaallugulu takusinnaasaanni avannaani aalisarneq pillugu inatsisissap isumasioqatigiissutaanerani aalisarnermut piniarnermullu naalakkersuisup oqaatigaa siulimi aalisarnermut naalakkersuisuusarsimasut sianerfigiinnarlugit aalisarsinnaanermut akuersissummik tunniussisarsimasut. Imalu 2. marts 2022 Ilulissani aalisarneq pillugu isumasioqatigiittoqarnerani Aalisarnermut piniarnermullu naalakkersuisoq ima oqariartuuteqarpoq.

“ … ukiut kingulliit 20-t immaqa qiviarutta amerlasoorujussuit aamma isernikuupput politikkerimut naalakkersuisumut sianilaaginnarlutik, taamaallaat akuersissutaa tunniunneqapallakkuni.”

Ukiuni 20-ini kingullerni naalakkersuisuusarsimasut tunniussiinnartarsimanngitsut aalisarnermut piniarnermullu naalakkersuisup naalakkersuisup apeqquteqarninnut akissummini uppernarsarpaa. Taamaattumillu ukiuni kingullerni 20-ini Naalakkersuisuusarsimasunut 11-init eqqunngitsumik pasinarsarlugit oqaatigisimanerinut utoqqatserfigisariaqarai isumaqarpunga.

Apeqqutikka annerusumik tunngavilersunngikkaluarlugit kissaatigaara apeqqutima ullut suliffiit qulit iluini akineqarnissaat.


[1] §37 – 2022/57