Qasigiannguani Siumup ataatsimeersuarnerani Siumut Qasigiannguit arfininngornermi unnukkut timersortarfimmi unnussiuaaqatigiissitsipput. Ataqqinaammik ilaasortanngortitsineq ilanngullugu takkussimasorpassuit ilagalugit ingerlanneqarpoq. Ataqqinartumut Paviamut siulittaasoq ima oqaaseqarpoq.
Asasara Pavia
Siumup nuna tamakkerlugu ataatsimeersuarneranut atatillugu, siulersuisuunerit aalajangersimapput inunnik marlunnik ataqqinaammik ilaasortanngortitsiniarlutik. Tassa arnamik angummillu toqqaavugut.
Ataqqinaammik ilaasortanngortitsinermut atatillugu suliarpassuavit ilamininngui kiisalu kinaanerit tamanut oqaluttuarilaarusuppara.
Pavia Nielsen ukiorpassuarni piniartoq aalisartorlu, kommunalbestyrelsimut, Inatsisartunullu ilaasortaasimasoq KNAPK-milu siulittaasuusimasoq 1936-mi Julip 28-ani Qaarsuni inunngorpoq.
Pavia nuliaqarpoq Emma, marluullutillu sisamanik qitornaqarput, ullumikkulli marluinnaat akornatsinniipput. Paviakkut sisamanik ernutaqarput marlunnillu ernutaqqiuteqarlutik.
Pavia suliarpassuaqarpoq aammalu misilittagai annertoqisut inuiaqatigiinni nunattalu avataaneersut, soorlu pisuussutigut pillugit saqqummiinissaannut atorluartarpaa. Taamaattumik qinikkatut kattuffilerinermilu suliarpassui atorluarneqarluarput. Pavia 1963-miit 1967-imut Uummannap kommuniani kommunalbestyrelsimut ilaasortaavoq, nangittumillu aamma 1971-imiit 1975-p tungaanut. Pavia aamma 1979-imi Inatsisartunut qinigaavoq, aammalu 1983-imiit 1984-imut kiisalu aamma 1991-imiit 1995-imut Inatsisartunut ilaasortatut sulisimalluni.
Paviap kattuffilerinermittaaq ingerlataqarneq soqutigilluarlugu ingerlattarsimavaa, KNAPK-milu 1973-miit 1989-p tungaanut siulersuisuinut ilaasortaasimavoq. Pavialu 1991-p tungaanut KNAPK-mi siulittaasutut sulisimalluni.
1994-mi Nersornaammik sølviusumik saqqarmiulerneqarpoq, ukiorlu taanna aamma “ridder af Dannebrog”-mittaaq nersornaaserneqarluni.
Siulersuisuunerit isumaqatigiittut aaliangerpaat Pavia Nielsen, Siumut nuna tamakkerlugu Qasigiannguani 2023-imi ataatsimeersuarnerani ataqqinaammik ilaasortanngortinneqarnissaa pissasoq.
Taamaattumik ataqqinartoq Pavia Nielsen, Siumumi Siulersuisuunerit sinnerlugit matumuuna ataqqinaammik ilaasortanngortinneqarninnut uppernarsaat tunniuppara, neriullunga tigulluassagit.
Pilluarit.