Aalisarnermut Piniarnermullu Naalakkersuisoq, Aqqaluaq B. Egede, KNR-imut oktobarimi 25-ani oqarpoq, naak 3,1 mio. kronit atorlugit nutaamik qilalukkat pillugit kisitsisoqassagaluartoq, Pinngortitaleriffiup Kangiani qilalukkat eqqissisimatitaanissaanik attassiinnarnera tupaallaatigigini. Naalakkersuinikkut nalilerneqartariaqalerpoq, suliassamut Pinngortitaleriffik atorneqassanersoq, imaluunniit allat suliassamut attuumassuteqanngitsut atorneqassanersut
All.: Lars Poulsen, Inatsisartunut ilaasortaq, Siumut
Qilalukkanik kisitsinissaq naammassineqassaaq. Isumaqarpunga Naalakkersuisoq pineqartoq tupaallaatigissallugu pissutissaqanngitsoq. Ukiorpassuarni qilalukkat sumiiffinni inoqarfinnut pingaaruteqarluinnarlutik inissisimasut tavattumik oqaluuserisarsimavagut, qanoq amerlatigineri ilisimanngitsutut pissusilersornerput ilanngullugu.
Politikkikkut aalajangernerit uumassusilerituunut suliakkiissutigineqartut naammassineqassapput, kisitsinerit ilanngullugit. Pinngortitaleriffik kisitsinissarluunniit suli pinngitsoq naalakkersuisumut ima paasineqarsinnaasumik oqariartoreerpoq, kisitsisoqaraluarpalluunniit Pinngortitaleriffik peqassutsi eqqarsaatigalugu allaanerusumik siunnersuissalluni pissutissaqanngitsoq. Qanorluunniimmi aalajangiusimarpasippaat, peqassutsi taannaasoq, naak ukiorpassuarni kisitsisoqarsimanngikkaluartoq. Kisitsiniminerit kingulliit pisut tassaapput 2008-mi 2017-imilu.
Taamaammat naalakkersuinikkut nalilerneqartariaqarpoq, suliassamut Pinngortitaleriffik atorneqassanersoq, imaluunniit allat suliassamut attuumassuteqanngitsut atorneqassanersut.
Isumaqarpunga ilisimasatsinnik tigussaasunik tutsuiginartunillu peqassagutta, ukiut tamaasa kisitsisarneq ingerlanneqartariaqartoq. Peqassutsi tamakkiisumik qalipaasersugaanngitsumillu ilisimalertariaqarparput. Minnerunngitsumik aalajangiisussatut uppernarsisinnaasariaqarparput, peqassutsi pillugu oqariartuutit ilumut upperisinnaanerlutigik – Isummersornermiigatik ilisimasaqassutsimiittut uppernarsisinnaasariaqarpavut.
Taamaattumik Pinngortitaleriffik tutsuiginassuseqassaguni peqassuseq navianartorsiortinneqartoq navianartorsiortinneqanngitsorluunniit pillugit kisitsisariaqarpoq. Ukiut tallimat matuma siornatigut kisitsisimaneq aallaavigalugu taamak aalajangerneq atorsinnaanngilaq. Uumasut ingerlaartuupput. Uumasoq una inuunitsinnut pingaaruteqarpoq. Taamaattumik akisussaaffeqartumik suliaq naammassineqartariaqarpoq. Qassiunersut tutsuiginartumik paasisariaqalerpavut.