Nunaqarfiit katataasut

Pilersaarutit kusanartut isumalluarnartut 2016-mili nunaqarfinnut tunngasut saqqummiunneqarsimagaluarput, kinguneqanngisaannartut

All.: Laura Táunâjik Uitsatikitseq, Sermersuummi kommunalbestyrelsimut ilaasortaq

Nunaqarfinni illut inoqanngitsorpassuit takussaalerfianni ilaqutariippassuit inuusuttullu inissaaleqisut takussaajuarnerat ulluinnarsiutaalernikuuvoq. Inissialiornissaq ukiuni arlaqalersuni ineriartortinneqanngilaq allaat oqartariaqarluni unilluinnarnikuusimavoq, allaat kaattarpalaannguit takorluugaannanngorsimallutik. Illut nutaanngeqisut kisiisa annermik piupput, taakkulu ullutsinnut naleqqutinngilluinnartuupput. Akerlianik inuusuttortagut angajoqqaaminni, aanakkuminni ilaquttaminnilluunniit najugaqartariaqartut takujuarpagut, naak nammineerusunneq pigigaluarlugu periarfissaqartitaanngillalli.

Ilinniartitsisut illuutaat 1960-ikkunnili sanaartugaapput pitsaanerpaajunnaarsimallutik nutartertariaqalersimasut, tamakkuli inerisarneqaratillu allannguiffiginiarneqanngillat. Naak atuarfiup iluani meeqqat angusaannik pitsanngorsaaniaraanni ilinniartitsisut ilinniarsimasut pisariaqartinneqarluinnaraluartut taamaattoq inerisaaniartoqanngilaq. Tamatuma nassataraa meeqqat 7 kl-mi trintest-eraangamik angusaasa appasilluinnarsinnaanerannik. Tamanna aaqqinneqassappat tunngaviit pingaarnerit aaqqiivigineqartariaqarput, tassa inissialioqqinnissaq. Kommunip aningaasatigut kivissinnaanngippagu Namminersorlutik Oqartussat avitseqatigineqarsinnaapput.

Pilersaarutit kusanartut isumalluarnartut 2016-mili nunaqarfinnut tunngasut saqqummiunneqarsimagaluarput, kinguneqanngisaannartut. Isumalluartoqartuaraluaq maanna neriuut qamilluinnalersimavoq. Naak akerlianik aalisarnikkut ineriartortitsineq ilorraap tungaanut ingerlagaluartoq allatigut aaqqissuusseqqinnissamik inissiatigut sanaartortoqanngilaq. Tamanna innuttaasunit nikalluutaavoq annertooq. Aalisarnikkut ineriartorneq pippat allorassaaqatigiinnermik nassataqartussaagaluarpoq. Tamannali iluatsissinnaanngippat imaaginnannginnerpa? ”Kikkut tamarmik naligiipput, ilaalli allaniit naleqarnerulaarput”

Utoqqaat pisinnaanerusut angerlarsimaffii nunaqarfinniuppat allaallumi illoqarfimmi pitsaanngilluinnarput. Utoqqarnut naleqqutinngillat, kiassaataat qamikulasut, igalaat ilummut suertut, kuuffiit illup ataatigut ingerlasut, illullu ilui isugutasut. Illersorneqarsinnaanngitsumik sannarlutaapput. Ukiukkut qilaavi apummik immertartut, kiatsikkaangat sialleraangalluunniit qilaap killinganiit imeq kuuttoq. Tupinnanngitsumik illup ilui oqussunnipput utoqqarnullu najugaritissallugit tulluanngilluinnartut.

Akisussaaffik annerpaaq Kommunitta iluaniippoq, iliuutsilli piviusunngortitat amigarpallaarujussuarput. Ilaatigut taakkartorniarneqarput aningaasat Namminersorlutik Oqartussat ataani qinnutigineqarsinnaasut ima amerlatigisut 27.mio.kr angullugit annertussuseqarlutik. Tamakkuli qaammarsaassutigineqanngippata atorneqanngisaannartussaapput. Nittarsaassisoqanngippat nikittoqarnavianngilaq. Naammanngilaq oqarluartaarineq, iliuuseqarnissarli sakkussat sunniuteqarsinnaasut annersaraat.

Nunaqarfiit puigugaanerat maanna mumisittariaqalerpoq, uparuartuinerinnakkut aaqqiissuteqarsinnaanngilagut suleqatigiinnerli aqqutissatuaraarput.