Mala Høy Kúko, Inatsisartunut ilaasortaq, Siumut
Inatsisartut suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut:
- NAMMCO-mut Kalaallit Nunaat 1990-mili ilaasortanngorattali Naalakkersuisut immikkut ittunik qilalukkanik pisassanik qassinik tunisinikuuppat pisarineqartussat qaavatigut?
- Naalakkersuisut immikkut ittumik qilalukkanik tunniussisarnerminnik piffinni qanga (ukioq) tunniusaqarnikuuppat?
- Immikkut ittuni Naalakkersuisut qilalukkanik pisassiissuteqarnerminni piffinni tamani qassit pisarineqanngitsoornikuuppat?
- NAMMCO-mut ilaasortaaffeqalertinniit ukiuni 31-ni Kalaallit nunatsinnut sukkut iluaqutigisimavarput?
- Naalakkersuisut Kalaallit nunatta NAMMCO-mut ilaasortaanera pillugu nalilersuinissamik pilersaaruteqarpat?
- Naalakkersuisuniit nalilersuinissamut pilersaaruteqartoqanngippat suna tunngavilersuutigineqarpa?
Tunngavilersuut:
Ukiuni 31-vinngortuni NAMMCO mut Kalaallit Nunarput ilaasortaanitsinni kalaallit nunatsinni piffinni nunatta kangiani (tunumi taaneqartartumi) piniartutut ilaqutariinnut inuuniarnikkut ilungersunartorsiortitsinerat siunissamut ernumanartutut piniartukkormiut ukiuni arlalinngortuni oqaatigiuartalernikuuvaat. Tassa inuuniarnermikkut aningaasatigut isaatitsinermikkut tapertatut iluaqutigisartorujussuuvaat qilalukkap mattaa, kiisalu neqaata panertillugu tuniniartarneratigut.
Tasiilarmiut Ittoqqortoormiullu eqqarsaatigalugit qilalukkanik pisassat ukiut ingerlaneranni ikiligaluttuinnarput. Tassa ukioq 2022 Tasiilami qilalukkanik pisaasat 0-ngussapput. Ittoqqortoormiunut 2022-mi pisassat 15-nit 2023-milu 10-t. Kalaallit nunaata illuatungaa (tunu) innuttat piffinni aalajangersimasunuinnaq inooqataasut tassa pisassaarutsinniarneqarput qullersaninngaaniit. Aali kalaalinnguit siulimi inooriaasiinik peqqissaartumik nangitseqqinnikuullutik inooqataasut.
Pisassanillu Naalakkersuisut ikililiinissamik periuseqaraluartut ukiuni taakkuninnga innuttaasunut tunumiunut inuussutissaqarsinnaanikkut periarfissanik allanik tikkuussisoqarnikuunngilaq. Taamaammat Naalakkersuisunut apeqqutit paaserusunnarput innuttaasut sinnerlugit.
Ullut qulit iluanni akissutisinissara pissasoq naatsorsuutigaara.