Inatsisartut ukiakkut 2023-mi ataatsimiinnerminni Parisimi isumaqatigiissummut tunngasumik pingaarutilimmillu aalajangiussaqarput. Naalakkersuisut maanna nalunaarutigisussanngorpaat, isumaqatigiissummut ilanngunnissatsinnut soqutiginnittugut. Taamaattoq pingaaruteqarpoq erseqqissassallugu tamanna isumaqanngimmat, piumasaqaateqarata namminerisamillu isumaqatigiissummut peqataalissasugut.
All.: Kuno Fencker, Inatsisartunut ilaasortaq, Siumut
Namminersorneq pillugu Inatsimmi § 12 naapertorlugu nunanut allanut politikitta nunarsuarmioqatigiit suleqatigiiffiinut ilisimatitsissutigineqarnerani kunngeqarfik attavigineqartussaavoq. Pingaaruteqarpoq inatsit naapertorlugu sulinitsinni siunertarissallugu, Kalaallit Nunaata Parisimi isumaqatigiissummut tunngatillugu ilanngunnissaq nammineq isumagissagaa aamma Danmarkimi nunanut allanut politikimik oqartussaaffik ilanngutitinnagu Nunarput toqqaannaq Naalagaaffiit Peqatigiinnut isumaqatiginninniassasoq.
Piumasaqaatit taakku naammassisimatinnagit isumaqatigiissummut ilaalernissarput siunertaqaranilu isumaqanngilaq. Taamaakkami Naalakkersuisunut alloriarnissaq tullinnguuttoq unaassaaq, siuliassamut piareersaatissat pisariaqartut tamarluinnaasa suliarissagaat, tamakkununnga ilaallutik silap pissusaa pillugu anguniagassat aalajangersarneqarnerat aamma periusissiornernut peqataatitsinernullu Kalaallit Nunaanni soqutigisaqaqatigiiffiit tamaasa peqataatinnissaat ilanngullugu.
Siumumi naatsorsuutigaarput ingerlavissaq taanna piffissamik atuiffiussasoq, tassami pitsaassuseq qarsupittumik suliaqarnerminngaanniit pingaartinneruarput. Takorloorparput isumaqatigiissuteqarneq ukioq 2030-p missaani pisinnaassasoq. Tamanna inissinneqareerpat, immikkuualuttut tamarmik Inatsisartuni suliarineqaqqittussaassapput.
Aatsaat tamakku naammassereerpata nalilersinnaanngussavarput Parisimi isumaqatigiissummut ilaalernissaq tunngavissaqarnersoq. Tamanna tunngavilerneqarsinnaassasoq upperaarput, kisianni kunngeqarfiup Namminersorneq pillugu Inatsimmut ataqqinninnera aamma apeqqutaaqataassaaq aamma Naalagaaffiit Peqatigiiffiata akuereqqaassavaa, Kalaallit Nunaat naalagaaffiunani nunarsuarmioqatigiit (naalagaaffiit) isumaqatigiissutaannut isumaqatigiissuteqarluni ilanngussinnaanersoq.
Isumaqatigiissuteqarnissaq Parisimi isumaqatigiissummi immikkoortoq 20 naapertorlugu pissaaq. Kalaallit Nunaata attassinnaasumik siunissaqarnissaa tamatta suleqatigiilluta sulissutiginera nangitsigu.
Inatsisartut aalajangiussaat ima oqaasertaqarpoq:
“Kalaallit Nunaata Parisimi isumaqatigiissummut ilanngunnissamik siunertaqarnerata Naalagaaffiit Peqatigiit Silap pissusia pillugu nunani tamalaani isumaqatigiissutaannut, United Nations Framework Convention on Climate Change-imut (UNFCCC) nalunaarutigineqarnissaanut Naalakkersuisut peqquneqarnissaannik Inatsisartut aalajangiiffigisassaattut siunnersuut”