Paamiuni aalisakkerinermik suliaqartunik toqqammaviusumik ilinniarfeqalertariaqarpoq

Kalaallit Nunaanni aalisarneq nappatigaarput, taamaakkaluartorli naleqquttumik aalisakkerinermik ilinniarfimmik peqanngilagut

All.: Dorthe-Marie Mogensen-Fontain, Paamiuni Siumup siulittaasua, Sermersuummi kommunalbestyrelsimut ilaasortaq

Uani Paamiut aalisarnermik ilinniarfeqalernissaa suleqatigiit akimorlugit pilersinneqartariaqarpoq. Paamiut aalisakkerinermik suliffissuaq piukkunnaatilerujussuuvoq toqqammaviusumik ilinniarfeqalernissaanut, taassumalu saniatigut imarsiornermik ilinniarfik Paamiuni inissisimavoq.

Nunatta aningaasaqarnikkut nappatigisaani; aalisakkanik suliffissuarni sulisuusut pingaarutilerujussuupput, nunattali siunissaa eqqartortillugu aammalu anguniartillugu  ilinniagaqarneq aammalu ilinniagaqalernissaq anguniarneqartuarpoq. Taamaakkaluartorli nunatta aningaasarsiornikkut nappataata inerisaqqinnissaanut ilinniarfinnik  peqarata.

Siumumit isumaqarpugut aalisakkerinermik toqqammaviusumik ilinniarfeqalernikkut suliffissuarni sulisartut atugaanik pitsanngorsaasoqassasoq, tamannalu inuiaqatigiinnuttaaq aamma pingaarutilerujussuuvoq uani ilaqutariinnut amerlasuunut atugassarititaasut pitsaanerulernerannik kinguneqartussaammat.

Uani toqqammaviusumik ilinniarfeqalernerup ineriartorteqqittuarneqarsinnaanera killeqanngilaq.

Avammut tunisassat suliarisarneranut pitsanngorsaataassaaq annertuumik, aammalu tassuuna avammut niuerutigineqartartut nalitusarnissaanut anguniagaq qanillisaataasussaalluni.

Taamaasilluni avammut niuernikkut aalisarnikkut tunngasunik ilinniarfissanik aqqutissiueqataassaaq unalu toqqammaviusumik ilinniarfik aallartiffiussallunilu.

Sulisartut suliffissuarni sulisuusut nunatsinni pingaarutilerujussuit ukiorpassuarni “sumiginnarneqarsimapput” taamaattumillu uani Siumumit anguniarparput aaqqissuussisoqarnissaa suliffissuarni sulisunut piorsaaqqinneq, inerisaaqqinneq ineriartornerlu.

Uanilu Paamiuni inissisimanissaanut toqqammavissaqarluarpugut. Paamiut ukioq naallugu aalisarfiuvoq, aalisakkallu suliarineqartartut assigiinngiiaartuullutik. Inissiat isaterneqartussatut pilersaarutaasut blokki ataaseq uani ilinniariarlutik tikittunut inissiatut atorluarsinnaavoq. Inissiat uani ilaqutariinnut aammalu kisimiittunut amerlasuut pigineqarput.

2009-imilu. Kommunerujussuit pilersinneqarmata ineriartortitsineq Paamiuni uninnikuuvoq, allaallumi sulisunik Nuummut nussortitsineq ingerlanneqarnikuulluni, kommunerujussuup nassatarisaanik pissutsit ilungersunangaartut naammaleqaat.

Taamaattumik ineriartortitseqqinnissaq aalisarnerup tungaatigut toqqammaviliisumik annertunerusumik peqalernissaq uani aallunneqartariaqarpoq. Inuiaavugut aalisarnikkut nappateqartut tassuunalu suli ineriartortitassaqaqaagut, unalu alloriarneq siullertut ingerlatassaraarput pingaaruteqarluinnartoq. Inuili tassaavoq nerisassiornikkut ilinniarfik tamannalu sammisaq maannamut ingerlalluareersoq sammivimmik immikkut pilersitsilersoq nangillugu suleqatigiinnermik toqqammavilerlugu ilinniarfik piareersarneqartariaqarpoq.