Uumasut nakorsassaaleqineq killiffeqartariaqarpoq

All.: Doris Jakobsen Jensen, Inatsisartut Kultureqarnermut Ataatsimiititaliaanni siulittaasup tullia, Avannaata Qimussersuinut illersuisoq

Nunatsinni uumasut nakorsassaarutilerpugut. Pingaartumik nunatta avannaani nunattalu kangiani qimminik qimuttoqarfiusuni nersutinut nakorsaqanngilaq.

Tamatuma kinguneraa qimmit massakkut katsorsarneqarsinnaannginnerat. Taamaattumik, nersutip nakorsaanit qimmit passunneqarsinnaanissaat qulakkeerniarlugu iliuuseqartariaqarpugut.

Ullumikkut, Nuummi kisimi nersutit nakorsaannut nakorsiartoqarsinnaavoq. Tassa qularutissaanngitsumik nunatsinni nersutit nakorsaqarnikkut, uumasuutit nakorsaasersorneqarnerisigut aammalu katsorsarneqarsinnaanerisigut amigaateqarluinnaratta.

Tamanna massakkut nersutit nakorsaasunut qimmiutilinnullu ajornartorsiutaavoq annertooq.

Qimminik kinguaassiorsinnaajunnaartitsineq pinngitsoorani nersutip nakorsaanit suliarineqartussanngortinneqarmat, pisariaqarluinnarpoq piaarnerpaamik ajornartorsiummut aaqqiissutissamik nassaartoqarnissaa.

Ajornartorsiut tamaat isigalugu annertuvoq, tassami ilisimavarput uumasut nakorsassaaleqineq ima annertutigisoq allaat piffissami aaliangersimasumi Australiamiik nunatsinnut tikisitsisoqartariaqartalersoq.

Kissaatiginarpoq Naalakkersuisut immikkut ittumik ajornartorsiut qaangerniarlugu iliuuseqassasut aamma uumasut nakorsanngorniartunut praktikkerfissanik pissarsiniartarneq eqqarsaatigalugu.