Siumut Folketingimi ilaasortaatitaata Aki-Matilda Høegh-Damip qinigaaffimmi matumani neriulluarlunilu anguniagaqarpoq. Suliniutinik arlalinnik Kalaallit Nunaannut iluaqutaasussanik angusaqarluarnissani siunnerfigaa
Statsministerip ammaalluni oqalugiaataa Folketingimi ilaasortanit sisamanngormat oqallisigineqarpoq. Tassani Aki-Matilda Høegh-Damip ukiunut tulliuttunut anguniakkani saqqummiuppai.
Anguniakkani piviusunngortinnissai siunnerfigaa – Folketingimi ukiorpassuarni suliarineqarsimanngitsorpassuit ilaatigut nutarsarniarlugit siunnerfeqarpoq.
– Inuussutissat pillugit oqartussaaffiit pillugit aalajangiussimasat, Nunanut allanut tunngatillugit oqartussaaffik aamma inuiaqatigiinnut ilanngutititsisarneq pillugit aalajangiussat, pinerluttaalisitsinermut inatsit kiisalu kalaallit Danmarkimi najugaqartut inatsisitigut illersorneqarnissaat aamma sulissutigineqassaaq, Aki-Matilda Høegh-Dam oqaluttarfimmit oqarpoq.
Qinigaaffik aamma nutaaliorfiussaaq. Danmarkip Kalaallit Nunaannut oqartussaaffii itinerusumik suliarineqartalernissaat siunnerfigaa.
Aalajangiinernut Kalaallit Nunaat taamaammat peqataatinneqarnerusalissasoq Aki-Matilda Høegh-Damimut pingaaruteqarpoq.
Tamanna Naalagaaffeqatigiinneruvoq – Kalaallit Nunaat politikikkut kalaallit Inuinut pisinnaatinneqarnerusoq, ulluinnarnimi kalaallit atugaannut Christiansborgimi aalajangiisoqartarpoq. Taamaattumik politikikkut kalaallit peqataatinneqarpallaartannginnerat Aki-Matilda Høegh-Damimit maqaasineqarpoq. Issittoq pillugu politikikkut aalajangiussanut Kalaallit Nunaat peqataatinneqarnerunissaa Aki-Matilda Høegh-Damimit pingaartinneqarluni suliarineqassaaq.
Suliassarpassuit saniatigut aamma qinigaaffiup siuliani suliarineqarsimasut inaarsarneqarnissaat Aki-Matilda Høegh-Damimit sulissutigineqassaaq. Kalaallit Nunaata nunasiaataanerani susoqarpiarsimanersoq ilisimaneqarnerulissaaq. Kalaallit Danmarkimi najugaqartut inatsisitigut illersugaanerussapput. Danskit innuttaasuisa Nunarput pillugu ilisimasaat annertusarneqassaaq, kiisalu kalaallit Inuisa isigineqarnerat ullutsinnut tulluarnerusumik isigineqalernissaat aamma sulissutigissallugu.
– Innuttaasunik nukittuunik tunuliaqutaqarlunga maaniissinnaanera nuannaarutigaara. Issittumi innuttaasut sinnerlugit maani sulissaanga, Aki-Matilda Høegh-Dam oqaluttarfimmi oqarpoq.
Oqalugiaat tamakkiisoq uani atuaruk.